AUV-i njofton se ka ndaluar importin e shpezëve dhe produkteve të tyre nga Italia

Agjencia e Ushqimit dhe e Veterinarisë (AUV) ka njoftuar se ka ndaluar importin e shpezëve dhe produkteve të tyre nga Italia në Kosovë.

Sipas njoftimit, ky vendim vjen duke u bazuar në raportin e fundit të Organizatës Botërore për Shëndetin e Kafshëve (WOAH) dhe Raportit të Komisionit Evropian, të cilët kanë njoftuar se në shtetin e Italisë është i pranishëm Gripi i Shpezëve në fermat komerciale dhe në shpezët e egra në Regjionin Emilia-Romagna dhe Lombardia të Italisë.

“Ndalohet importi i kafshëve të gjalla, shpezëve dhe i produkteve të tyre të cilat e kanë origjinën nga zonat e infektuara të shtetit të Italisë, përveq nëse e kanë origjinën nga fermat e pa prekura me sëmundjen në një rreth prej 50 km. largësi nga zonat e prekura” – thuhet në njoftim.

Sipas AUV-it, kjo ndalesë hyn në fuqi menjëherë dhe do të mbetet në zbatim deri në vlerësimin e mëtejshëm të situatës nga autoritetet përkatëse ndërkombëtare dhe nga AUV-i.