Gazetari i KALLXO.com fiton vendin e parë për Raportimin më të Mirë në Ekonomi për vitin 2025
Gazetari i KALLXO.com, Egzon Dahsyla, ka fituar vendin e parë për Raportimin më të Mirë në Ekonomi për vitin 2025, të ndarë nga Asociacioni i Gazetarëve të Kosovës (AGK).
Gazetari Dahsyla këtë çmim e ka fituar me hulumtimin “Kurdisja e Tenderit: Audioincizime se si kryeshefi i KRU Gjakova u përfshi në negociata për një tender të ndërmarrjes”.
Hulumtimi “Kurdisja e Tenderit: Audioincizime se si kryeshefi i KRU Gjakova u përfshi në negociata për një tender të ndërmarrjes” ishte publikuar në emisionin “Kallxo Përnime” me 09.03.2025.
Aty janë publikuar audioincizime që ndërlidhen me tenderin për servisim të automjeteve të KRU Gjakovës.
Vendi i parë u nda mes gazetarit Egzon Dahsyla dhe Alberta Hashani nga Betimi për Drejtësi.
Vendin e dytë e mori Sanije Isufi nga Koha, ndërsa vendin e tretë Arjeta Shabani nga Gazeta Reporteri.
Në hulumtimin e Kallxo Përnime, publikohet audio-incizime në të cilat dëgjohej Hasan Krasniqi, kryeshef ekzekutiv i ndërmarrjes, teksa flet për negocim kontrate dhe konfirmohej përfshirjen e tij në kontaktimin e biznesmenëve që do të merreshin me servisimin e makinave të ndërmarrjes.
Audio-incizimet e publikuara dëshmonin se kryeshefi e kishte pranuar para stafit të tij se i ka dhënë instruksione shoferit të tij, Valon Gunga, për të dalë dhe për të gjetur kompani që servisojnë makina.
“Jam shku te N.R. edhe te Xh., se Nita më tha. Unë vetë- personalisht… I thash a ka bre mundësi me na dhonë dokumentet, licencën, veç me e bo një kontratë- nuk ke me i servisu ti kerret. Nëse don me i servisu – servisoj” – dëgjohet në audioincizim kryeshefi Krasniqi, duke treguar se si ka shkuar te një kompani e caktuar për t’i kërkuar vetëm dokumentacionin për nënshkrimin e kontratës.
“Jam shku …, i kam thënë djalit të vetë: a po na jep vetëm të drejtën se je kompani dhe faturimet dalin kah ti. Më ka thënë: drejtor më vjen keq, nuk du me e ngarku kompaninë, është e ngarkume, cdo faturë ma kanë lypë (nuk kuptohet), kontabilisti, hymja, dalja (nuk kuptohet)… nuk po du me e ngarku kompaninë”, dëgjohet duke thënë Krasniqi.
Hulumtimi dëshmon se pas këtij procesi, kontrata u nënshkrua me një operator ekonomik, ndërsa servisimi i makinave në realitet po kryhet në kompaninë që e drejton vëllai i negociatorit, Valon Gunga, pra te kompania ‘4G Auto’, në pronësi të Dukagjin Gungës.
Hasan Krasniqi është duke u hetuar zyrtarisht nga Prokuroria Speciale në lidhje me tri raste të ndryshme, të cilat ishin iniciuar për hetim pas raportimeve të KALLXO.com.
https://kallxo.com/lajm/bastisjet-ne-kru-gjakova-lidhen-me-tri-hulumtimet-e-kallxo-com-per-tre-tendere-te-dyshimte/
