Trump merr kontrollonin e policisë dhe nxjerr Gardën Kombëtare në Uashington

Presidenti amerikan, Donald Trump, ka bërë të ditur se ka nxjerrë 800 pjesëtarë të Gardës Kombëtare në Uashington dhe se përkohësisht ka marrë kontrollin e departamentit policor të kryeqytetit, duke përdorur kompetencat e jashtëzakonshme presidenciale për rendin në kryeqendrën politike amerikane, raporton Reuters.

Lëvizja e Trumpit, me të cilën ka shmangur autoritetet e zgjedhura të qytetit, është emblematike për mandatin e tij të dytë, ku autoriteti ekzekutiv i tij është përdorur disa herë me pak precedentë në historinë moderne amerikane dhe në kundërshtim me normat politike.

Presidenti ka thënë se veprimet e tij janë të domosdoshme për “shpëtimin” e Uashingtonit nga vala e mungesës së ligjshmërisë. Të dhënat tregojnë se krimi i dhunshëm e ka arritur kulmin në vitin 2023, porse prej atëherë ka nisur të shënojë rënie.

“Kryeqyteti ynë është vërshuar prej bandave të dhunshme dhe kriminelëve gjakpirës”, ka thënë Trump në një konferencë për media në Shtëpinë e Bardhë.

Është hera e dytë gjatë kësaj vere që presidenti republikan nxjerrë trupat ushtarake në një qytet të qeverisur nga demokratët rivalë. Të hënën ka nisur një proces gjyqësor në San Francisko nëse Trump kishte shkelur ligjin kur kishte nxjerrë trupat e Gardës Kombëtare në Los Anxhelos në qershor pa marrë aprovimin e guvernatorit të Kalifornisë, Gavin Neëscom.

Dhe Trump ka sinjalizuar se edhe qytetet e tjera të mëdha amerikane nën udhëheqjen demokrate mund të jenë në radhë, përfshirë Çikagon, qytet që kaherë është veçuar për shkallën e krimit të dhunshëm, megjithëse sivjet është raportuar për rënie të theksuar të kriminalitetit.

Përgatiti: Rexhep Maloku – Kallxo.com