Takohen Osmani e Prattipati, diskutojnë për hapat drejt konstituimit të plotë të Kuvendit

Presidentja Vjosa Osmani ka pritur sot, më 28.08.2025, në takim të ngarkuarën me punë të Ambasadës së SHBA-së në Kosovë, Anu Prattipati.

Presidenca ka njoftuar se gjatë takimit u diskutua për zhvillimet e fundit në vend, përfshirë edhe hapat e mëtejshëm drejt konstituimit të plotë të Kuvendit.

“Gjatë takimit u diskutua për zhvillimet e fundit në vend, përfshirë zgjedhjen e kryetarit të Kuvendit dhe shumicës së nënkryetarëve, si dhe hapat e mëtejshëm drejt konstituimit të plotë të Kuvendit. Në mesin e temave të diskutuara ishte edhe bashkëpunimi dypalësh, ku u rikonfirmua gatishmëria për avancimin e mëtejshëm në fusha me interes strategjik për të dyja vendet”- thuhet në njoftim.

Po sipas njoftimit, në prag të Javës së Nivelit të Lartë të Asamblesë së Përgjithshme të Kombeve të Bashkuara në New York, ku presidentja Osmani do të marrë pjesë edhe këtë vit si kryesuese e delegacionit të Kosovës në cilësinë e saj si kreu i shtetit, u diskutua për agjendën si dhe pritshmëritë nga takimet dhe aktivitetet e planifikuara.