Supremja refuzon padinë për mbulesën islame në shkolla, konfirmon kompetencën e MASHTI-it për rregullat e uniformës

Gjykata Supreme e Republikës Kosovës ju ka dhënë të drejtë shkollave që ju ndalojnë bartjen e shamive nxënësve në objektin e shkollës.

“Gjykata Supreme çmon se rregullat e miratuara nga Ministria e Arsimit, Shkencës dhe Teknologjisë, të cilat ndalojnë bartjen e çdo veshjeje tjetër përveç uniformës shkollore, janë në përputhje me ligjin dhe me kompetencën e deleguar ligjore, dhe si të tilla nuk përbëjnë tejkalim të autorizimeve të dhëna nga ligjdhënësi”- thuhet në njoftimin e Gjykatës Supreme.

Lidhur me këtë rast, Rrjeti i Femrave për Zhvillim Profesional “Arrita”, kanë paraqitur padi në Gjykatën Supreme që të vlerësohet ligjshmëria e udhëzimit administrativ “Kodi i Mirësjelljes dhe Masat Disiplinore për Nxënës të Shkollave të Mesme të Larta”, duke e paditur MASHTI-in.

Sipas padisë është kërkuar që të shfuqizohet ky udhëzim administrativ i cili trajton çështjen e ndalimit të mbulesave në shkolla.

Paditësja me tej ka theksuar se me nenin 55.1 të Kushtetutës, saktësohet qartë se “të drejtat dhe liritë themelore të garantuara me këtë Kushtetutë, mund të kufizohen vetëm me ligj”, duke shtuar se në katër vitet e fundit kanë pranuar ankesa të shumta nga vajzat që janë përjashtuar nga shkollat publike ose të cilave u është pezulluar vijimi i rregullt i procesit mësimor për shkak të bartjes së shamisë në kokë.

Në njoftim thuhet se Gjykata Supreme e Kosovës ka shqyrtuar me kujdes bazën ligjore të aktit nënligjor normativ të konstatuar dhe ka vlerësuar se nga dispozitat e Udhëzimit Administrativ rezulton se MASHTI ka autorizim të qartë ligjor për të përcaktuar rregulla për sjelljen e nxënësve, përfshirë edhe rregullat për veshjen – uniformën.

“Gjykata Supreme e Kosovës, ka shqyrtuar me kujdes bazën ligjore të aktit nënligjor normativ të kontestuar, përkatësisht Udhëzimit Administrativ Nr.06/2014, dhe ka vlerësuar se dispozita nga neni 3 paragraf 1, nën paragraf 1.13, gjen mbështetje në Ligjin nr. 04/L-032 për Arsimin Parauniversitar në Republikën e Kosovës dhe në Ligjin nr. 04/L-138 për Arsimin dhe Aftësimin Profesional. Nga këto dispozita rezulton se Ministria e Arsimit, Shkencës dhe Teknologjisë, ka autorizim të qartë ligjor për të përcaktuar rregulla për sjelljen e nxënësve, përfshirë edhe rregullat për veshjen – uniformën. Rrjedhimisht, akti nënligjor është në përputhje me autorizimin e shprehur ligjor të dhënë nga ligjvënësi”- thuhet në njoftimin e Supremes.

“Përcaktimi sikurse në aktin e kontestuar, me të cilin ndalohet bartja e uniformës fetare në shkolla, gjen mbështetje në një akt më të lartë ligjor për nga fuqia hierarkike, andaj si i tillë nuk mund të shfuqizohet”- thuhet më tej në këtë njoftim të publikuar më 29.10.2025.

Gjykata Kushtetuese e Republikës së Kosovës, ka potencuar një vendim të vitit 2011 ku janë bërë interpretimet e të drejtave dhe lirive themelore të njeriut, vendim i cili ka qenë në pajtim me parimet themelore të Gjykatës Evropiane të të drejtave të Njeriut.

Në këtë vendim të vitit 2011 është theksuar se liria fetare është çështje e ndërgjegjjes individuale dhe përfshin manifestimin e fesë në mënyrë private dhe publke, por nuk e mbulon çdo veprim të motivuar nga feja.

Tutje në njoftimin e Gjykatës Supreme, duke cituar vendimin e Gjykatës Kushtetuese të vitit 2011 thotë se në një shoqëri ku bashkëjetojnë fe të ndryshme, kjo liri mund të kufizohet për të ruajtur harmoninë dhe respektin për besimet e të gjithë qytetarëve duke ju lënë rol neutral dhe të paanshëm të shtetit si garant i tolerancës fetare.

Tutje vendimi i cituar i kushtetueses ka potencuar se rregullat për bartjen e simboleve fetare në institucione arsimore dallojnë nga vendi në vend duke u bazuar në traditat kombëtare.

Prandaj, Gjykata Supreme ka vlerësuar se ligjdhënësi, në mënyrë të tërthortë por të qartë, ka përcaktuar kufizime të pranueshme në lidhje me veshjen e nxënësve, duke i lënë në kompetencë të ministrisë përkatëse caktimin e këtyre rregullave nëpërmjet akteve nënligjore.

Gjykata Supreme çmon se rregullat e miratuara nga Ministria e Arsimit, Shkencës dhe Teknologjisë, të cilat ndalojnë bartjen e çdo veshjeje tjetër përveç uniformës shkollore, janë në përputhje me ligjin dhe me kompetencën e deleguar ligjore, dhe si të tilla nuk përbëjnë tejkalim të autorizimeve të dhëna nga ligjdhënësi.