LVV dorëzon ankesë në Supreme kundër vendimit të PZAP-së për ndalimin e votimit jashtë objekteve të përfaqësive diplomatike

Lëvizja Vetëvendosje më 03.12.2025 ka dorëzuar ankesë në Gjykatën Supreme kundër vendimit të PZAP-së për ndalimin e votimit të bashkatdhetarëve në qendrat e votimit të identifikuara përmes përfaqësive diplomatike.

Përmes një njoftimi, LVV ka thënë se Ligji për Zgjedhjet qartazi parasheh mundësinë e hapësirave jashtë objekteve të përfaqësive diplomatike, të marra nën administrim nga përfaqësitë diplomatike me qëllim të krijimit të mundësive reale për të votuar për të gjithë shtetasit.

“Ligji për Zgjedhje jo që nuk e ndalon, përkundrazi krijon bazë të mjaftueshme për KQZ-në për të krijuar hapësira që garantojnë qasje për votuesit”- thuhet në njoftim.

LVV tutje ka thënë se edhe standardet ndërkombëtare të mishëruara në opinionet e Venecias dhe dokumentet tjera afirmojnë votimin fizikisht jashtë vendit në vendvotimet e hapura për këtë synim, sikurse edhe praktikat e vendeve të shumta me infrastrukturë ligjore të ngjashme konfirmojnë si legjitime e të zakonshme hapjen e vendvotimeve jashtë vendit.

Paneli Zgjedhor për Ankesa dhe Parashtresa (PZAP) ka pranuar ankesën e Lidhjes Demokratike të Kosovës (LDK), e cila ka kërkuar që të ndryshohet vendimi i Komisionit Qendror Zgjedhor (KQZ), i cili parashihte që qendra të votimit të hapeshin edhe në hapësira shtesë, jashtë përfaqësive diplomatike.

Referuar vendimit të PZAP-së, të publikuar nga Donat Lushaku, zëdhënës në Komunën e Prishtinës, theksohet se KQZ ka shkelur ligjin duke miratuar hapjen e qendrave të reja jashtë misioneve diplomatike.

PZAP në vendim ka deklaruar se votimi vetëm në hapësirat diplomatike është një masë mbrojtëse për integritetin e votës dhe se kjo nuk paraqet pengesë për votuesit jashtë vendit.

https://kallxo.com/lajm/pzap-anulon-vendimin-e-kqz-se-qe-votimi-jashte-vendit-te-behet-edhe-jashte-perfaqesive-diplomatike/