Sorensen: Situata politike në Kosovë nënkupton që gjërat mund të marrin më shumë kohë

I dërguari i BE-së për dialogun Kosovë – Serbi, Peter Sorensen, ka thënë situata politike në Kosovë mund të “vonojë gjërat”, duke nënkuptuar zhvillimet në dialog.

Ai këtë deklaratë e dha para gazetarëve, pas takimeve të ndara që ka zhvilluar me presidenten Vjosa Osmani dhe kryeministrin në detyrë Albin Kurtin, më 06.08.2025.

Sorensen tha se diskutimet kanë qenë rreth asaj se si të zbatohet Marrëveshja e Ohrit.

“Jam këtu në kuadër të mandatit tim. Diskutuam se si të zbatohet Marrëveshja e Ohrit dhe për situatën në terren. Sigurisht, situata politike këtu [në Kosovë] nënkupton që gjërat mund të zgjasin pak më shumë. E di këtë! Pra, ky është një takim i rregullt dhe jam shumë i lumtur që jam këtu sot dhe që jam pritur në këtë mënyrë” – tha Sorensen.

Kur u pyet nga gazetarët se cila është gjendja e dialogut aktualisht, Sorensen u përgjigj shkurt “gjallë dhe në formë”.

Presidentja e Kosovës, Vjosa Osmani, në takimin që ka pasur me të dërguarin e BE-së për dialogun Kosovë – Serbi, Peter Sorensen, ka kërkuar angazhimin e ndërkombëtarëve në lidhje me arrestimet e fundit të shtetasve të Kosovës në Serbi.

Sipas njoftimit të Presidencës, Osmani i ka kërkuar bashkësisë ndërkombëtare angazhim që Serbia t’i ndalë arrestimet arbitrare.

Përveç kësaj, Osmani në takim ka kërkuar edhe largimin e masave të BE-së ndaj Kosovës, që i ka quajtur të padrejta dhe për të cilat ka thënë se i prekin më së shumti qytetarët e Kosovës.

Ajo po ashtu ka folur për rëndësinë e intergrimit të Kosovës në organizatat ndërkombëtare, me theks në Këshillin e Evropës.

Kosova dhe Serbia janë në bisedime të ndërmjetësuara nga Bashkimi Europian për normalizimin e marrëdhënieve nga viti 2011.

Ky proces kishte nisur fillimisht për çështje teknike, për të kaluar më pas në nivel politik.

Edhe pse janë nënshkruar Marrëveshje shumica prej tyre nuk janë zbatuar, ndërsa dialogu vazhdon të shihet herë si i “vdekur” e herë në “komë”.

https://kallxo.com/lajm/osmani-ne-takim-me-sorensenin-kerkon-heqjen-e-masave-te-be-se-ndaj-kosoves-dhe-dialog-te-paanshem/