Misionet diplomatike kritikojnë moscertifikimin e Listës Serbe, Kurti u shmanget gazetarëve
Kryeministri në detyrë, Albin Kurti, më 03.12.2025 nuk pranoi të marrë pyetje nga mediat, pas reagimeve të shumta të misioneve diplomatike në Kosovë, lidhur me moscertifikimin e Listës Serbe nga ana e KQZ-së, për të marrë pjesë në zgjedhjet e parakohshme të 28 dhjetorit 2025. I ftuar në një aktivitet, ai thjesht iu shmang gazetarëve duke ua pamundësuar të shtrojnë pyetje për çfarëdo çështjeje.
Gjatë kësaj dite Ambasada e Shteteve të Bashkuara të Amerikës në Kosovë, më 03.12.2025 ka reaguar pas moscertifikimit të Listës Serbe në Komisionin Qendror të Zgjedhjeve, për zgjedhjet e parakohshme të 28.12.2025.
“Tentativa e VV-së për të bllokuar certifikimin e Listës Serbe për të marrë pjesë në zgjedhjet e Kosovës është shkurtëpamëse dhe përçarëse”- thuhet në reagimin e ambasadës.
Kjo ambasadë ka shkruar se të gjithë qytetarët e Kosovës duhet të iu mundësohet shfrytëzimi i të drejtave të tyre demokratike.
“Veprime të tilla, minojnë stabilitetin e Kosovës dhe interesat e SHBA-së, duke përfshirë rifillimin e dialogut tonë strategjik për të avancuar mundësitë për bizneset amerikane dhe të Kosovës”- ka shkruar ambasada amerikane.
Edhe Ambasada e Gjermanisë në Kosovë, ka reaguar më pas duke shprehur “keqardhjen për sjelljen penguese të disa anëtarëve” të KQZ-së.
“Na vjen keq për sjelljen penguese të disa anëtarëve të Komisionit Qendror të Zgjedhjeve në refuzimin për të certifikuar Listën Serbe për zgjedhjet e ardhshme të përgjithshme. Procesi zgjedhor dhe përgatitjet teknike për zgjedhjet duhet të jenë të lira nga manovrimet politike nga aktorët politikë.” – thuhet në reagimin e kësaj ambasade.
Një ditë më herët ka reaguar ambasadori britanik në Kosovë, Jonathan Hargreaves. Ai ka thënë se një veprim i tillë nga ana e KQZ-së kërcënon reputacionin e Kosovës, siç ka thënë ai, të fituar me vështirësi.
“Jam seriozisht i shqetësuar për përpjekjen e fundit të akterëve politikë për të penguar Listën Serbe të marrë pjesë në proceset zgjedhore. Veprime të tilla kërcënojnë të shkatërrojnë reputacionin e fituar me vështirësi të Kosovës si demokraci shumëetnike dhe të dëmtojnë marrëdhëniet me partnerët e saj të ngushtë. Shpresoj që Paneli Zgjedhor i Ankesave dhe Parashtesave të vlerësojë edhe një herë aplikimin e Listës Serbe për certifikim sipas ligjeve dhe rregulloreve të Kosovës”- ka thënë Hargreaves.
Edhe Zyra e Bashkimit Europian në Kosovë ka shprehur keqardhje lidhur me vendimin e Komisionit Qendror të Zgjedhjeve, i cili nuk e ka certifikuar Listën Serbe për zgjedhjet e parakohshme parlamentare të 28 dhjetorit.
Sipas Zyrës së BE-së, politizimi i KQZ-së nga Lëvizja Vetëvendosje dhe partitë e tjera politike është i dëmshëm për një proces zgjedhor gjithëpërfshirës.
Komisioni Qendror i Zgjedhjeve, më 02.12.2025 nuk e ka certifikuar Listën Serbe për zgjedhjet e parakohshme parlamentare të 28 dhjetorit 2025.
Më 2 vota pro, dy kundër dhe 7 abstenime, KQZ ka refuzuar certifikimin e këtij subjekti politik.
Para votimit u zhvillua një debat mes anëtarëve të KQZ-së lidhur mënyrën e votimit për certifikim.
Me marrëveshje certifikimi i partive politike u bë veç e veç për subjekte politike.
Sekretariati i KQZ-së rekomandoi certifikimin e 23 subjekteve politike për zgjedhjet parlamentare.
Ndërsa, sipas Sekretariatit të KQZ-së, më 03.12.2025, do të trajtohetj edhe kërkesa e Nismës Socialdemokrate për certifikim.
Edhe kjo parti u certifikua pastaj.
Në ndërkohë, Lista Serbe thirri konferencë për media.
Kryetari i kësaj partie, Zllatan Elek, kritikoi, siç e ka quajtur ai “regjimin e Albin Kurtit”, i cili, sipas tij, po përpiqet t’ia pamundësojë partisë së tij pjesëmarrjen në zgjedhjet e parakohshme parlamentare.
“Edhe pse kemi të drejtë të marrim pjesë në zgjedhjet parlamentare për shkak se jemi parti parlamentare, fatkeqësisht regjimi i Albin Kurtit në Prishtinë dëshiron ta pamundësojë pjesëmarrjen e Listës Serbe e me këtë t’ia pamundësojë të drejtën popullit serb të zgjedhë përfaqësuesit legjitimë nga radhët e popullit serb”- tha Elek në një konferencë për media në Mitrovicë të Veriut.
Rreth vendimit të KQZ-së të datës 02.12.2025, ai paralajmëroi se do të bëjnë ankesë në Panelin Zgjedhor për Ankesa dhe Parashtresa (PZAP).
Shënim: Artikulli është përditësuar, me ç’rast është përfshirë edhe reagimi i Listës Serbe. Koha e editimit: 04.12.2025, ora 01:02.
