Qeveria franceze mbijetoi dy mocione mosbesimi pas koncesioneve për pensionet

Kryeministri francez, Sebastien Lecornu i ka mbijetuar dy mocione mosbesimi në parlament të enjten (16.10.2025), duke siguruar përkrahjen kritike nga Partia Socialiste falë premtimit për pezullimin e reformës së kontestuar të pensioneve të presidentit Emmanuel Macron, raporton Reuters.

Dy mocionet e paraqitura nga partia ekstreme, Franca e Papërkulur, dhe partia e ekstremit të djathtë, Tubimi Kombëtar (RN), siguruan vetëm 271 përkatësisht 144 vota – shumë më pak se 289 votat e nevojshme për rrëzimin e qeverisë së Lecornut, e cila u formua një ditë më parë.

Oferta e Lecornut për të pezulluar reformën e pensioneve deri pas zgjedhjeve presidenciale të vitit 2027 ndihmoi sigurimin e përkrahjes socialiste, duke e shpëtuar në Asamblenë Kombëtare thellësisht të fragmentuar.

Pavarësisht pezullimit, lëvizjet nënvizuan brishtësinë e administratës së Macronit në mes të mandatit aktual.

“Një përballë përmes pazarllëqeve arriti sot të shpëtojë pozicionet e saj, në kurriz të interesit kombëtar”, ka shkruar president i RNsë, Jordan Bardella, në X.

Tregu francez i obligacioneve mbeti i qëndrueshëm pas votimeve të njëpasnjëshme, me fitoren qeveritare që mezi pritej nga investitorët.

Në parlament ka 265 deputetë nga partitë që thanë se do të votonin për rrëzimin e Lecornut, dhe vetëm një grusht rebelësh nga grupet e tjera iu bashkuan kauzës së tyre.

Nëse Lecornu do të kish humbur ndonjërën nga mocionet, ai dhe ministrat e tij do të duhej të jepnin dorëheqjen, dhe Macron do të vihej nën presion të madh për të shpallur zgjedhjet e parakohshme parlamentare, duke e zhytur Francën më thellë në krizë.

Përgatiti: Rexhep Maloku – Kallxo.com