Macron: Trump duhet ta ndalë luftën në Gazë nëse e do Nobelin për Paqe
Nëse presidenti i Shteteve të Bashkuara të Amerikës, Donald Trump, dëshiron përnjëmend ta fitojë çmimin Nobel për Paqe, atëherë duhet ta ndalë luftën në Gazë, ka deklaruar presidenti francez, Emmanuel Macron, raporton Reuters.
Duke folur për televizionin francez BFM të martën në Nju Jork, Macron ka thënë se vetëm Trump ka pushtetin që t’i bëjë presion Izraelit që t’i japë fund luftës.
“Ka vetëm një njeri që mund të bëjë diçka për këtë punë, dhe ai është presidenti i Shteteve të Bashkuara”, ka deklaruar Macron.
“Dhe arsyeja pse ai mund të bëjë më shumë se ne është sepse ne nuk furnizojmë me armë që lejojnë luftën në Gazë. Ne nuk furnizojmë me pajisje që lejojnë luftën në Gazë. Por Shtetet e Bashkuara të Amerikës, po”.
Trump ka mbajtur fjalim sfidues dhe të gjatë në Asamblenë e Përgjithshme të Kombeve të Bashkuara të martën, ku ka hedhur poshtë lëvizjet e aleatëve perëndimorë për mbështetjen e një shteti palestinez, duke thënë se ky do të ishte shpërblim për militantët e “Hamasit”.
“Ne duhet ta ndalojmë menjëherë luftën në Gazë. Ne duhet të negociojmë menjëherë paqen”, ka deklaruar Trump.
Duke diskutuar fjalimin e Trumpit, Macron ka theksuar: “Shoh një president amerikan që është i përfshirë, i cili e përsëriti këtë mëngjes nga podiumi: ‘Dua paqe. Kam zgjidhur shtatë konflikte’, i cili dëshiron Çmimin Nobel për Paqen. Çmimi Nobel për Paqen është i mundur vetëm nëse e ndalni këtë konflikt”, ka shtuar Macron.
Vende të tilla si Kamboxhia, Izraeli dhe Pakistani janë ndër ato që e kanë nominuar Trumpin për çmimin vjetor për ndërmjetësimin e pakteve të paqes ose armëpushimeve.
Trump ka thënë se meriton vlerësimin ndarë nga Norvegjia katër prej paraardhësve të tij në Shtëpinë e Bardhë. “Presidenti Trump ka bërë më shumë për paqen sesa të gjithë të pranishmit në Kombet e Bashkuara së bashku”, ka deklaruar zëdhënësja e Shtëpisë së Bardhë, Anna Kelly.
“Vetëm ky president mund të kishte arritur kaq shumë për stabilitetin global, sepse ai në fakt e e ka bërë Amerikën përsëri të fortë”, ka theksuar ajo.
Përgatiti: Rexhep Maloku – Kallxo.com
