Presidentja Osmani ka takuar ish-policin e Njësisë Speciale, i cili ishte arrestuar në Serbi

Presidentja Vjosa Osmani ka njoftuar se të hënën, më 24.11.2025, ka pritur në takim ish-policin Arbnor Shapi, i cili ishte mbajtur në paraburgim në Serbi. Autoritetet serbe e akuzonin për përfshirje në rastin e Banjskës.

Ish-pjesëtari i Njësisë Speciale të Policisë së Kosovës, Arbnor Spahiu, është liruar më 21.11.2025 nga paraburgimi në Serbi dhe është kthyer në Kosovë.

Përmes një postimin në Facebook, presidentja Osmani ka pohuar se ish-pjesëtari i Njësisë Speciale është liruar nga paraburgimi në Serbi pas disa muajsh mbajtjeje peng.

Presidentja u ka bërë thirrje qytetarëve që jetojnë jashtë dhe që planifikojnë të udhëtojnë në Kosovë të shmangin kalimin nëpër Serbi.

“Arbnorit i urova gjithë të mirat pranë familjes së tij dhe një rikthim sa më të lehtë në normalitet. Qytetarëve tanë që jetojnë jashtë Kosovës dhe që mund të udhëtojnë drejt vendit sidomos gjatë festave të fundvitit, u bëj thirrje të shmangin kalimin nëpër Serbi, pasi atje vazhdojnë të jenë në pushtet struktura që nuk dallojnë në mendësi nga regjimi i kaluar serb”- ka shkruar presidentja në Facebook.

Spahiu ishte arrestuar më 7 qershor 2025 dhe ndaj tij u shqiptua masa fillestare e paraburgimit.

Prokuroria në Serbi inicioi procedurë penale me pretendimet për përfshirje të Spahiut në rastin e Banjskës, në veri të Kosovës, ku një grup i serbëve të armatosur ka sulmuar Policinë e Kosovës në shtator 2023, duke vrarë rreshterin Afrim Bunjaku.

https://kallxo.com/lajm/ish-polici-i-kosoves-arbnor-spahiu-lirohet-nga-paraburgimi-ne-serbi/