Operacioni ndërkombëtar "The Wanted" - 42-vjeçari ekstradohet nga Zimbabve në Shqipëri (VIDEO)

Policia e Shtetit ka njoftuar se kanë lokalizuar, kapur dhe ekstraduar 42-vjeçarin L.D, nga Zimbabve në Shqipëri.I shpalluri në kërkim, L.D, i cili ka linduar në Lushnje, është ekstraduar falë bashkëpunimit mes Interpol Tirana dhe Interpol Harare, në kuadër të operacionit policor ndërkombëtar “The Wanted”.

Ky shtetas ishte shpallur në kërkim ndërkombëtar pasi Gjykata e Posaçme kundër Korrupsionit dhe Krimit të Organizuar (GJKKO), në vitin 2022, i kishte caktuar masën e sigurisë “Arrest në burg”, për veprat penale “Korrupsioni aktiv i funksionarëve të lartë shtetërorë ose i të zgjedhurve vendorë” dhe “Pastrimi i produkteve të veprës penale ose i veprimtarisë kriminale”, të kryera në bashkëpunim.

Nga hetimet ka rezultuar se shtetasi L. D., në cilësinë e administratorit të një kompanie private, ka përfituar fonde publike në mënyrë të paligjshme, përmes faturave dhe pagesave fiktive, për punë dhe shërbime të pakryera.

Pas mbërritjes në Shqipëri, 42-vjeçari iu dorëzua Drejtorisë së Përgjithshme të Burgjeve.