Shkodër, dyshohet se kanosën fqinjin me armë zjarri, arrestohet një i dyshuar, tjetri në kërkim
Policia e Shtetit ka arrestuar një 37-vjeçar në Shkodër pasi dyshohet se kërcënoi fqinjin e tij me armë zjarri.
Sipas Policisë, në këtë konflikt dyshohet se është përfshirë edhe një 22-vjeçar, i cili është shpallur në kërkim.
“Specialistët për Hetimin e Krimeve të Komisariatit të Policisë Shkodër, në bashkëpunim me shërbimet e Patrullës së Përgjithshme, të mbeshtetura nga shërbimet e Forcës së Posaçme “Shqiponja”, menjëherë pas marrjes së njoftimit se në rrugën “Tafilica”, një shtetas ishte kanosur me armë zjarri, kanë organizuar punën për kapjen e autorit/ëve dhe zbardhjen e rrethanave të rastit”- thuhet në komunikatë.
“Si rezultat i veprimeve të shpejta, u kap në flagrancë dhe u arrestua shtetasi M. B., 37 vjeç, banues në Shkodër. Gjithashtu, u shpall në kërkim shtetasi A. G., 22 vjeç, banues në Shkodër”- theksohet në komunikatë.
Në njoftim u bë e ditur se nga hetimet dyshohet se këta dy shtetas gjatë një konflikti për motive të dobëta me fqinjin e tyre, shtetasin E.K., e kanë kanosur me armë zjarri – pistoletë
Policia thot se 22-vjeçari dyshohet se sapo ka konstatuar punonjësit e Policisë ka marrë armën e zjarrit dhe është larguar me vrap.
Më tej, Policia bën të ditur se materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.
