Një muaj arrest shtëpiak për D. Etemin, dyshohet se falsifikoi dokumente në tenderin në Gjilan - Detaje nga Dosja e Prokurorisë

Gjykata Themelore në Gjilan më 15.04.2025 ka caktuar arrest shtëpiak prej një muaji ndaj të pandehurit D. Etemi, i cili dyshohet për veprën penale “keqpërdorimi dhe mashtrimi në prokurim publik”.

Kjo u konfirmua nga Sabit Shkodra, Udhëheqës i Zyrës për Informim në Gjykatën e Gjilanit.

“Është aprovuar Kërkesa e Prokurorisë Themelore për caktimin e masës së arrestit shtëpiak prej një muaji për të pandehurin D.E.” – tha Shkodra për KALLXO.com

Në Kërkesën për caktim të masës së arrestit shtëpiak, në të cilën pati qasje KALLXO.com, thuhet se D. Etemi në cilësinë e personit të autorizuar më 20.09.2023, në emër të Kompanisë “Fortesa SH.P.K.” në Prizren, ka shkelur rregullat e prokurimit publik gjatë një oferte për dhënie të Kontratës duke paraqitur dokumentacion të rremë.

Prokuroria pretendon se D. Etemi ka falsifikuar nënshkrimin e J.P., pronar i Kompanisë “Eing Com” në një marrëveshje bashkëpunimi, më 06.10.2023, për dhënie me qira të një makinerie. Po ashtu, sipas Dosjes së Prokurorisë D. Etemi ka falsifikuar edhe vulën e kësaj Kompanie.

Më këto veprime Prokuroria e Gjilanit thotë se i pandehuri ka synuar të mashtrojë në procedurën e tenderit, me qëllim ndikimin në Vendimin e Komunës së Gjilanit si Autoritet Kontraktues dhe të përfitojë në mënyrë të kundërligjshme shumën prej 400,000 eurosh.

Në arsyetimin e Kërkesës Prokuroria i ka listuar edhe disa prej provave materiale që kanë grumbulluar deri në këtë fazë, ku përmendët edhe Kërkesa e KALLXO.com.

KALLXO.com më 31.01.2025 kishte raportuar se si Kompania “Fortesa SH.P.K.” ishte futur në “listë të zezë” nga Organi Shqyrtues i Prokurimit Publik për “falsifikim të vulës dhe nënshkrimit në tenderin e Komunës së Gjilanit” për “rregullimin e rrugëve të arave për nevojat e bujqësisë”.

Edhe përkundër kësaj as Komuna e Gjilanit e cila ishte inicuese e tenderit, e as Organi Shqyrtues i Prokurimit, i cili më 08.11.2024 e ka vendosur Kompaninë në “listë të zezë”, nuk e kanë dërguar këtë rast në Prokurorinë e Shtetit.

Rasti ishte regjistruar nga Prokuroria e Gjilanit dhe i është ndarë një Prokurori vetëm pasi KALLXO.com është interesuar dhe ka dërguar pyetje.

Kërkesën për caktimin e masës së arrestit shtëpiak, Prokuroria thotë se e bazon në faktin se veprimet e të pandehurit përbëjnë tipare të veprës penale dhe nëse D. Etemi lihet në liri do të kishte për pasojë shkatërrimin e gjurmëve.

https://kallxo.com/gjate/oshp-e-vendosi-ne-liste-te-zeze-per-falsifikim-te-vules-dhe-nenshkrimit-prokuroria-inicion-rast-pas-interesimit-te-kallxo-com/