Mogherini jep dorëheqje si rektore e Kolegjit të Europës pas hetimit për mashtrim

Dorëheqja shton presionin ndaj hetimit për favorizim të dyshuar mbi trajnimin diplomatik të financuar nga Bashkimi Europian, raporton Euractiv.

Federica Mogherini, ish-kryediplomatja e Bashkimit Europian, ka dhënë dorëheqje nga detyra si rektore e Kolegjit të Europës pasi u përmend si e dyshuar në një hetim për mashtrim mbi favorizim të dyshuar në trajnimin diplomatik të financuar nga BE-ja.

Në një deklaratë pas një takimi të Komitetit Ekzekutiv të Kolegjit të enjten (04.12.2025), ajo ka theksuar: “Në përputhje me rigorozitetin dhe drejtësinë maksimale me të cilën kam kryer gjithmonë detyrat e mia, sot kam vendosur të jap dorëheqjen si rektore”.

Vendimi u mor një ditë pasi zyrtari i lartë i BE-së, Stefano Sannino, njoftoi se do të tërhiqej në fund të dhjetorit, siç u raportua për herë të parë nga Euractiv, pasi ishte përmendur gjithashtu si i dyshuar në hetim. Ai është kreu i Drejtorisë së Përgjithshme të Komisionit për Lindjen e Mesme, Afrikën e Veriut dhe Gjirin.

Hetimi i drejtuar nga prokurori i BE-së, përqendrohet te një kontratë njëvjeçare dhënë Kolegjit të Europës bazuar të një tender për të hapur një akademi të re për trajnimin e diplomatëve të rinj kombëtarë dhe nëpunësve civilë të BE-së për role të ardhshme që përfaqësojnë Europën jashtë vendit. Prokurorët dyshojnë se në vitet 2021–22, Kolegji dhe shërbimi diplomatik i BE-së mund të kenë bashkëpunuar për të drejtuar në mënyrë të papërshtatshme fondet e BE-së drejt projektit, duke i dhënë Kolegjit informacion paraprak për tenderin. Tenderi u hap zyrtarisht për universitetet në të gjithë Europën.

Mogherini mbetet e pafajshme përderisa hetimi vazhdon.

“Kam besim të plotë në sistemin e drejtësisë dhe besoj se korrektësia e veprimit të Kolegjit do të vërtetohet”, ka theksuar Mogherini në një deklaratë pasi u lirua nga paraburgimi, duke shtuar se do të ofrojë “bashkëpunim të plotë me autoritetet”.

Mogherini ka shërbyer si rektore e Kolegjit të Europës që nga viti 2020, duke mbikëqyrur kampuset e tij në Bruges, Varshavë dhe Tiranë. Ajo gjithashtu mori rolin e drejtoreshës së akademisë diplomatike në vitin 2022, një pozicion që qeveritë e BE-së e bënë të përhershme në vitin 2024, duke e financuar me një shumë prej 1.7 milion eurosh në vit.

Presidenti i Kolegjit të Europës, Herman Van Rompuy, i kontaktuar nga Euractiv, refuzoi të komentonte dhe theksoi se nuk dhënë intervista qe gjashtë vjet.

Përgatiti: Rexhep Maloku – Kallxo.com