Ministri Hajrulla Çeku gjatë konferencës për media. Foto: Isa Vatovci/KALLXO.com
Ministri Çeku reagon pas raportimeve për heqjen e flamurit të Kosovës në Kongresin e UEFA-s në Beograd
Ministri i Kulturës, Rinisë dhe Sportit, Hajrulla Çeku, ka reaguar pas raportimeve për heqjen e flamurit të Kosovës në Kongresin e 49-të të UEFA-s që është mbajtur në Beograd.
Përmes një postimi në Facebook, ministri Çeku ka thënë se largimi i flamurit të Republikës së Kosovës në Kongresin e UEFA-s në Beograd është veprim i turpshëm, i papranueshëm dhe i dënueshëm.
Çeku ka thënë Kosova është shtet i pavarur, që përfaqësohet në botë përmes simboleve shtetërore. Federata e Futbollit e Kosovës është anëtare me të drejta të plota e UEFA-s.
Sipas tij, largimi i simboleve është sulm i drejtpërdrejtë ndaj integritetit shtetëror të Kosovës dhe si i tillë nuk mund të kalojë pa reagim të mirëfilltë ndërkombëtar.
“Presim sqarime nga UEFA-ja dhe veprime efektive për të adresuar përgjegjësinë për këtë shkelje të rregullave të tyre të brendshme dhe këtë sulm ndaj shtetit të Kosovës. Dënojmë ashpër gjuhën e përdorur nga Federata e Serbisë në komunikatën e tyre, e cila mjerisht, me vetëdije të plotë pranon të instrumentalizohet nga politika shoviniste serbe”- ka thënë ai.
“Shteti serb nuk ka ndryshuar, është i njëjti që ka kryer masakra e gjenocid para pak dekadash. As atëherë e as sot, nuk e ka kursyer as sportin. Për këtë arsye, kërkojmë nga federatat europiane e botërore të sportit të mos organizojnë ngjarje sportive në Serbi për sa kohë ajo nuk e ndryshon qasjen në raport me pjesëmarrjen e Kosovës”- ka shkruar Çeku në Facebook.
Të enjten, më 03.04.2025, Federata e Futbollit të Serbisë njoftoi se ka hequr simbolet e Kosovës në Kongresin që u mbajt në Beograd.
Por, Federata e Futbollit e Kosovës theksoi se Kosova në këtë kongres është përfaqësuar me simbole shtetërore në përputhje me statusin si anëtare e barabartë në UEFA dhe FIFA.
Ndërkaq nga FFK-ja thanë se Kosova mori pjesë me simbole shtetërore.
Në Kongresin e 49-të të UEFA-s delegacioni i Kosovës ka qenë i kryesuar nga kryetari Agim Ademi dhe ushtruesi i detyrës së Sekretarit të Përgjithshëm, Markus Weidner.
