Mbreti i Jordanisë: Trupat ndërkombëtare nuk do të donin të zbatojnë paqen në Gazë

Shtetet do të refuzonin t’u kërkohej të “zbatonin” paqen në Gazë nëse do vendoseshin sipas planit të armëpushimit të presidenti amerikan, Donald Trump, ka paralajmëruar Mbreti Abdullah i Jordanisë për BBC-në.

Sipas planit të paqes prej 20 pikash të presidentit Trump, shtetet arabe dhe partnerët ndërkombëtarë duhet të zotojnë forca stabilizimi që “do të trajnojnë dhe ofrojnë mbështetje për forcat policore palestineze të verifikuara në Gazë dhe do të konsultohen me Jordaninë dhe Egjiptin që kanë përvojë të gjerë në këtë fushë”. Grupi “Hamas” duhet të çarmatoset dhe të heqë dorë nga kontrolli politik i territorit.

“Cili është mandati i forcave të sigurisë brenda Gazës? Dhe ne shpresojmë që të jetë paqeruajtës, sepse nëse është zbatim paqeje, askush nuk do të dëshirojë ta prekë atë”, ka deklaruar Mbreti Abdullah.

Në intervistën ekskluzive për BBC Panorama, ai ka thënë gjithashtu se Jordania dhe Egjipti janë të gatshëm të trajnojnë forcat palestineze të sigurisë.

“Ruajtja e paqes do të thotë të qëndrosh aty duke mbështetur forcën policore lokale, palestinezët, të cilët Jordania dhe Egjipti janë të gatshëm t’i trajnojnë në numër të madh, por kjo kërkon kohë. Nëse ne po vrapojmë nëpër Gazë duke patrulluar me armë, kjo nuk është një situatë në të cilën asnjë vend do të donte të përfshihej”, ka thënë ai.

Komentet e Mbretit pasqyrojnë shqetësimin e SHBA-së dhe vendeve të tjera për tërheqjen në një konflikt të vazhdueshëm ndërmjet “Hamasit” dhe Izraelit, ose “Hamasit” dhe grupeve të tjera palestineze.

Krijimi dhe dërgimi i një force ndërkombëtare në Gazë do të mund të përcaktonte nëse armëpushimi aktual ka mundësi që të evoluojë në një marrëveshje të qëndrueshme paqeje, dhe që izraelitët dhe palestinezët të kenë mundësi t’i afrohen sa më shumë synimin për paqe jetëgjatë.

Diplomatët dhe zyrtarët e tjerë nga vende të ndryshme, të cilët janë në rrjedha me situatën, thonë se ka pasur pak përparim që forca të grumbullohet për shkak të konfuzionit të misionit të saj, që duket të jetë një pengesë e madhe serioze, ka raportuar javën e kaluar edhe gazeta “The New York Times”.

Përgatiti: Rexhep Maloku – Kallxo.com