Kurti falënderon qytetarët për pjekuri në balotazh: Mbajeni përgjegjës tani secilin kryetar
Kryeministri në detyrë i Republikës së Kosovës, njëherësh kryetari i Lëvizjes Vetëvendosje, Albin Kurti ka falënderuar qytetarët për pjesëmarrje në balotazhin e 09.11.2025.
Qytetarët, sipas tij, treguan vullnet e pjekuri dhe i kontribuan demokracisë e orientimit të politikave publike në komunat e tyre.
“Mbajeni përgjegjës tani secilin kryetar për premtimet e dhëna dhe gjendjen në qytete e fshatra”- iu tha ai qytetarëve.
Kurti pati disa fjalë edhe për aktivistët e partisë së tij.
Atyre u tha se do të qeverisin me shtatë komuna dhe se Lëvizjen s’e ndali as bashkimi i të gjithë kundërshtarëve.
“Ju falemnderit çdonjërit për angazhimin. Na presin shumë punë e sfida, që do të thotë se para nesh ndodhen shumë suksese e fitore”- shkroi tutje Kurti.
Bazuar në rezultatet preliminare të KQZ-së, në zgjedhjet e balotazhit, LVV-ja fitoi në Mitrovicë të Jugut me Faton Pecin, në Gjilan me Alban Hysenin, në Obiliq me Halil Thaçin dhe në Fushë-Kosovë me Valon Prebrezën.
LDK-ja me Përparim Ramën fitoi në Prishtinë, me Gazmend Muhaxherin në Pejë, Bexhet Xheladinin në Dragash, Sokol Halitin në Viti dhe me Ruzhdi Shehu në Junik.
PDK-ja fitoi në Prizren me Shaqir Totajn, në Vushtrri me Ferit Idrizin dhe në Kaçanik me Sabedin Vishin.
AAK-ja e ruajti udhëheqjen në Gjakovë me Ardian Gjinin, në Suharekë me Bali Muharremajn, në Rahovec me Smajl Latifin dhe në Klinë me Zenun Elezajn.
Sipas KQZ-së, në këto rezultate nuk përfshihen vendvotimet me kusht, votimi i personave me nevoja të veçanta dhe votimet me postë.
Kreu i KQZ-së, Kreshnik Radoniqi, ka paralajmëruar se brenda javës së dytë mund të shpallen rezultatet përfundimtare të balotazhit që u mbajt të dielën.
Duke klikuar në këtë LINK, gjeni rezultatet preliminare të balotazhit.
