Komisioni Europian kritikohet për jotransparencë në marrëveshjet për vaksinat
Gjykata e Përgjithshme e Bashkimit Europian tha të mërkurën (17.07.2024) se Komisioni Europian nuk i ka ofruar publikut qasje të mjaftueshme në marrëveshjet për blerjen e vaksinave kundër coronavirusit.
Komisioni Europian, që është krahu ekzekutiv i BE-së, ka nënshkruar disa kontrata të mëdha me disa kompani farmaceutike në kulmin e pandemisë COVID-19, më 2020 dhe 2021.
Ligjvënësit e Parlamentit Europian janë ankuar në gjykatën me seli në Luksemburg, se kanë kërkuar t’i shqyrtojnë kontratat, për t’i kuptuar termat dhe kushtet, por se u është dhënë vetëm qasje e pjesshme.
Për më tepër, sipas tyre, disa dokumente janë redaktuar dhe Komisioni ka thënë se kjo është bërë për të mbrojtur interesat tregtare dhe procesin e vendimmarrjes.
Gjykata e Përgjithshme tha se Komisioni nuk ka dhënë prova se si qasja në disa klauzola të marrëveshjeve, do të minonte interesin tregtar të kompanive të përfshira.
Gjykata tha, po ashtu, se Komisioni ka mundur të japë më shumë informacione për deklaratat e anëtarëve të ekipit që ka negociuar kontratat.
“Komisioni nuk i ka marrë mjaftueshëm parasysh të gjitha rrethanat përkatëse, për t’i peshuar drejt interesat në fjalë”, tha gjykata.
Vendimi i saj vjen një ditë përpara se Parlamenti Europian të votojë për rizgjedhjen e Ursula von der Leyenit në postin e presidentes së Komisionit Europian./REL
