KDI: Presidentja të ofrojë transparencë për caktimin e mandatarit të dytë për formimin e Qeverisë 

Instituti Demokratik i Kosovës (KDI) ka kërkuar nga presidentja e vendit, Vjosa Osmani, që të ofrojë transparencë dhe qartësi për procesin e caktimit të mandatarit të dytë për formimin e Qeverisë. 

Përmes një reagimi publik, KDI thot se për të siguruar integritet dhe besueshmëri të këtij procesi, thelbësore është që të gjithë hapat e presidentes të jenë transparentë dhe të arsyeshëm, duke përfshirë publikimin paraprak të kritereve mbizotëruese që do të udhëheqin vlerësimin e “gjasës më të madhe për formim të shumicës”, si dhe sqarimin e formës përmes së cilës do të kërkohet dhe verifikohet mbështetja në Kuvend.

“Në këtë periudhë, Presidentja e vendit ka pasur obligim që brenda afatit dhjetëditor – pra, deri nesër – të zhvillojë konsultime me të gjitha partitë parlamentare, me qëllim të vlerësimit të gjasës reale për formimin e një shumice të re qeverisëse dhe shmangies së zgjedhjeve”- thuhet në njoftimin e lëshuar më 04.11.2025. 

Sipas këtij Instituti, këto kritere janë garanci substanciale të paanshmërisë dhe respektimit të rendit kushtetues.

Lëvizja Vetëvendosje ka mandatuar Glauk Konjufcën për kryeministër sot, më 04.11.2025.

“Unë si kryetar i Vetëvendosjes, propozoj që mandatin e dytë për krijimin e Qeverisë t’ia japim nënkryetarit, aktivistit, mikut e shokut tonë të afërt, e fort të besueshëm, Glauk Konjufca”- tha Kurti.

Ai ka lutur opozitarët që ta votojnë Konjufcën për kryeministër.

Ndërsa, Konjufca pas nominimit për mandatar, tha se partitë tash e kanë në dorë nëse duan ta votojnë Qeverinë apo duan zgjedhje të reja.