Imri Ahmeti komenton rezultatin e LDK-së në zgjedhje, kritikon strukturat në Mitrovicë e Vushtrri

Sekretari i LDK-së, Imri Ahmeti po e cilëson si rezultat të jashtëzakonisht të mirë rezultatin zgjedhor të Përparim Ramës në Kryeqytet.

Përparim Rama nga LDK dhe Hajrulla Çeku nga LVV do të përballen edhe njëherë në balotazh pasi asnjëri nuk arriti mbi 50% të votave.

“Në Prishtinë kemi dalë jashtëzakonisht mirë. Mendoj që ekziston një ambient i mire e favor i mirë për kryetarin Përparim Rama. Nuk kemi dilema që në Prishtinë do të fitojmë”- tha ai në emisionin “ KALLXO Përnime”.

Imri Ahmeti që sipas rezultateve preliminare fitoi pa balotazh edhe për një mandat në Lipjan komentoi rezultatin e LDK-së në Gjilan duke thënë se pritjet ishin tjera.

“Nuk ka qenë rezultat shumë i dobët. Natyrisht pritjet tona kanë qenë që të hyjmë në balotazh dhe të jemi të parët. Unë sa e di, nuk e kam numrin e saktë por duhet me pritë deri në fund numërimin” – tha Ahmeti.

Ndërsa për rezultatin e dobët në Mitrovicë, Imri Ahmeti ‘fajin’ e hedh te strukturat e partisë në këtë qytet.

“Rezultati kaq i dobët atje është rezultat i punës së strukturave tona atje, nuk e di se çfarë ka ndodhur. Se pritjet tona nuk kanë qenë për bash të ulët. Natyrisht kandidaturat kanë reflektu më pozitivisht se kandidatura jonë atje. Duhemi me reflektu. Ne jemi përpjekur me punu, por realisht rezultati ka qenë shumë i dobët”- potencoi ai.

Në Vushtrri, ish-kryetari i Komunës, Xhafer Tahiri nuk ka hyrë në balotazh, duke u renditur i treti sipas rezultateve preliminiare.

“Ne kemi pritur që të jemi në balotazh, pse nuk ka hy nuk e kemi idenë, do ta shikojmë. Duket se edhe atje strukturat nuk e kanë dhënë kontributin e duhur” – ka komentuar Ahmeti rezultatet preliminare në Vushtrri.

Në Komunën e Lipjanit sipas rezultateve preliminare të Komisionit Qendror të Zgjedhjeve (KQZ), kryetari i tanishëm, Imri Ahmeti nga Lidhja Demokratike e Kosovës (LDK), ka fituar pa balotazh në këtë komunë.

Kjo është hera e katërt që ai fiton postin e të parit të Lipjanit. Sipas rezultateve preliminare të KQZ-së, Imri Ahmeti ka fituar 51.15% të votave.