Gjykata e Apelit e vërteton dënimin me burgim të përjetshëm për Dardan Krivaçën

Gjykata e Apelit ka vërtetuar dënimin “me burgim të përjetshëm” për Dardan Kriavçën.

Dardan Krivaça akuzohet se ka vrarë Marigona Osmanin.

Gjykata e Apelit ka vërtetuar edhe dënimin “me 15 vjet” për Arbër Sejdiun.

Dardan Krivaça e Arbër Sejdiu në Rigjykimin e herës së dytë janë shpallur fajtorë për rastin e vrasjes së Marigona Osmanit, në gusht 2021.

“Gjykata e Apelit e Kosovës i ka refuzuar si të pabazuara Ankesat e Prokurorisë Themelore në Ferizaj, të përfaqësuesit të të dëmtuarve, M.O. dhe V.O. dhe të mbrojtësve të të akuzuarve, D.K. dhe A.S., duke e vërtetuar Aktgjykimin e Gjykatës Themelore në Ferizaj.” – thuhet në njoftimin e Gjykatës së Apelit

Gjykata në Ferizaj në Rigjykim Dardan Krivaçës i kishte shqiptuar dënim “me burgim të përjetshëm”, kurse Arbër Sejdiut për veprën penale “në bashkëkryerje të vrasjes së rëndë” i kishte rikualifikuar veprën penale “në ndihmë në veprën penale të vrasjes së rëndë” – duke e dënuar me dënim “me burgim në kohëzgjatje prej 15 vjetësh”.

Kurse, për veprën penale të dhunimit, Krivaça dhe Sejdiu për akuzën “ndihmë në dhunim” janë liruar nga akuzat.

Dardan Krivaça dhe Arbër Sejdiu akuzohen për “vrasje të rëndë në bashkëkryerje”.

Krivaça në Shkallë të Parë ishte dënuar me “burgim të përjetshëm” për vrasjen e Marigona Osmanit, kurse për “ndihmë në vrasje të rëndë” ishte dënuar me 15 vjet dënim “me burgim”, Arbër Sejdiu.

Gjithnjë sipas Aktakuzës, Krivaça dhe Sejdiu e kanë goditur të ndjerën me një shkop në pjesë të ndryshme të trupit, me ç’rast i kanë shkaktuar dhimbje të mëdha fizike dhe psiqike – duke shkaktuar vdekjen e viktimës.

Gjykata e Apelit me rastin e kthimit të rastit në Rigjykim kishte vlerësuar se Dispozitivi i Parë dhe i Dytë i Aktgjykimit është i paqartë, i pakuptueshëm dhe jo në harmoni me Ligjin.

Diapozitivi i Parë i Aktgjykimit ka të bëjë me veprën penale të dhunimit – veprime për të cilat Krivaça u lirua nga akuza. Ndërkaq, Dispozitivi i Dytë lidhet me akuzat ndaj Arbër Sejdiut për “ndihmë në kryerjen e dhunimit” – vepër për të cilën i njëjti ishte liruar nga Shkalla e Parë.

Krivaça akuzohet se me dashje dhe në bashkëkryerje me Arbër Sejdiun e privojnë nga jeta Marigona Osmanin. Me të njëjtën, Krivaça ka qenë në lidhje jashtëmartesore.

Më 22.08.2021 ishte njoftuar se një 18-vjeçare ishte dërguar pa shenja jete në Spitalin e Ferizajit.

Dosja e Prokurorisë tregon se video-incizimet paraqesin raportet mes të pandehurit Krivaça dhe së ndjerës, kurse pastaj ato sipas Prokurorisë ishin përkeqësuar.

Ne e konsiderojmë videon të besueshme dhe të saktë, video-regjistrimet tregojnë se në fillim, konkretisht, më 19.08.2021, raportet në mes të pandehurit Dardan Krivaça dhe së ndjerës kanë qenë të mira. Këto raporte fillojnë të përkeqësohen kur aty paraqitet i pandehuri Arbër Sejdiu, i cili vjen në orën 16:18, së bashku me Dardanin, ku me vete ka një çantë me rroba. Në orën 19:02, të pandehurit bisedojnë lidhur me kamerat, si dhe shikojnë se cilat pjesë të korridorit i kap kamera, ku lëvizin në pjesë të ndryshme për të verifikuar se cilat pjesë të korridorit i kap kamera dhe vërehet se rolin apo fjalën kryesore për këtë e ka Arbër Sejdiu. Në orën 19:56, Arbëri merr rrobat e tij dhe del nga banesa së bashku me Dardanin.” – shkruhet në Aktakuzën e Prokurorisë.

Prokurori në Aktakuzën e përpiluar ka përshkruar se si është organizuar dhunimi, e më pas vrasja e Marigona Osmanit.

“Më 21.08.2021, në ora 02:40, Dardan Krivaça, pas mesnate, derisa është në banjë me të ndjerën Marigona Osmani, e godet me dorë në fytyrë; 04:52: dalin nga banesa; 09:53: i pandehuri Dardan Krivaça dhe e ndjera Marigona Osmani kthehen, ku vërehet se e ndjera nuk ka kontroll të plotë, i merren mendtë; 10:02: i pandehuri e dërgon në banjë të ndjerën Marigona Osmani, del në ora 10:14, ku vërehet se e njëjta reziston, mirëpo është kapur me duar dhe shtyhet me forcë drejt sallonit; 10:48: e dërgon me forcë në banjë, ku e ndjera është e zhveshur, ndërsa i pandehuri është veshur ku qëndrojnë deri në orën 11:09. Kur dalin i pandehuri është zhveshur dhe të ndjerën e nxjerr me dhunë nga banja dhe e dërgon në dhomën e gjumit; 13:43: i pandehuri i cili është zhveshur i vendos kamerës një kapelë, e cila mbulon pamjen deri në orën 19:57.” – përshkruhet në Aktakuzë.

Raportimet e KALLXO.com, lidhur me këtë rast, mund t’i lexoni në këtë: LINK.