Gjakovë, ndalohet i dyshuari për të shtëna me armë nga një veturë në lëvizje

Policia ka njoftuar më 07.08.2025 se ka identifikuar dhe ndaluar personin që dyshohet për të shtënat me armë zjarri nga një veturë në lëvizje që ka ndodhur më 06.08.2025, rreth orës 14:00, në rrugën “Gjergj Sokoli”, në Gjakovë.

Policia ka njoftuar se gjatë kontrollit të dyshuarit i është konfiskuar edhe arma e zjarrit.

Identifikimi dhe ndalimi i të dyshuarit, sipas Policisë, është bërë pas një reagimi të menjëhershëm të njësive patrulluese, të cilat në vendin e ngjarjes gjatë ekzaminimit kanë gjetur dhe sekuestruar 11 gëzhoja të kalibrit 9x19mm dhe kanë identifikuar veturën nga e cila dyshohet se është shtënë me armë zjarri.

“Në bashkëpunim me njësitë e Stacionit Policor në Deçan, automjeti në fjalë është ndaluar dhe gjatë kontrollit janë sekuestruar: Një pistoletë CZ P-10C; dy karikatorë; 57 fishekë të kalibrit 9x19mm; 11 gëzhoja të kalibrit 9x19mm”- ka thënë Policia.

Sipas Policisë, personi i dyshuar është intervistuar, i është sekuestruar arma dhe janë iniciuar rastet – armëmbajtje pa leje, dhe – shkaktim i rrezikut të përgjithshëm.

Polica fton qytetarët që të raportojnë për çdo informacion të dyshuar në numrin falas 192, apo përmes aplikacionit digjital Lajmëro Policinë, duke dhënë kontribut për një mjedis më të sigurt.