Flet babai i ish-policit të arrestuar në Serbi: Arbnori po keqtrajtohet nga autoritetet serbe

Arbnor Spahiu, ish-polici i Kosovës, i arrestuar më 7 qershor në Serbi, është dorëhequr nga Policia e Kosovës më 1 nëntor 2022.

Kështu ka thënë për Dukagjinin babai i tij, Fatmir Spahiu, i cili po ashtu mban uniformën e Policisë së Kosovës.

I njëjti ngre dyshime se i biri po keqtrajtohet nga autoritetet serbe.

Spahiu thotë ndër të tjera se djali i tij është dorëhequr nga Policia para sulmit në Banjskë dhe tashmë po punonte në Gjermani bashkë me gruan.

“E ka lanë Policinë për me shku me punu jashtë për një jetë ma të mirë, me vete e ka pasë edhe gruan. Të dy i kanë ndalu, por nusen e kanë liru pas një kontrolle, ndërkaq djalin jo” – është shprehur Spahiu.

I njëjti thotë se janë në komunikim me Ministrinë e Punëve të Jashtme nga të cilët kanë marrë përgjigjen se tashmë po ndiqen procedurat e nevojshme.

“Asnjë thirrje s’kemi pasë nga Ministria e Brendshme, as nga Policia, institucion ku Arbnori ka shërbyer për shumë vite” – deklaron Spahiu.

Ish-pjesëtari i Policisë së Kosovës, Arbnor Spahiu, po akuzohet nga Serbia për kryerjen e veprës penale “vrasje e rëndë në Banjskë”./RTV Dukagjini