Inspektimi në sektorin e ndërtimit për punëtorë të padeklaruar - VIDEO
Në emisionin “Kallxo Përnime”, këtë të diel më 16.11.2025, krahas kontrollit të Administratës Tatimore të Kosovës në Zveçan, u transmetuan edhe pamje nga inspektimi në biznese të ndërtimtarisë.
Kontratat e punës janë obligative për secilin të punësuar në Kosovë. Sipas ligjit, kontrata e punës dhe deklarimi në ATK janë obligime për secilin punëdhënës, obligime këto të cilat duhet të përmbushen një ditë para se punëtori të nisë punën.
Shkelja e këtij rregulli është shkelje e ligjit dhe në rast se kjo ndodhë, dy institucione – Inspektorati i Punës dhe Administrata Tatimore e Kosovës janë të obliguara të ndërmarrin masa.
Që nga viti i kaluar secili punëtor i cili posedon një letërnjoftim të Kosovës mund të kontrollojë lehtësisht nëse punëdhënësi i tij, i ka zbatuar këto dy obligime.
Me një klikim të thjeshtë në faqen e ATK-së, secili mund të verifikojë të dhënat në fjalë dhe në rast se kuptohet që punëtori nuk është regjistruar, menjëherë duhet të njoftohen mekanizmat kompetentë.
Në fund të tetorit një ekip i Administratës Tatimore të Kosovës ishte mbledhur për të verifikuar informacione se në disa biznese të ndërtimit ka punonjës pa kontrata.
Me detyra konkrete, ekipi i ATK-së, i përbërë nga hetues e inspektorë, nisi kontrollin për t’i verifikuar informacionet në terren.
Në vazhdën e kontrollove për mosdeklarim të punëtorëve, cak i inspektimit ishte një vendpunishte në rajonin e Prishtinës.
Sipas rregullave, inspektorët e ATK-së, në vendin e ngjarjes marrin të dhënat personale të punëtorëve që hasen dhe mbi bazën e kontrolleve tutje, verifikojnë nëse të njëjtin janë deklaruar në sistem.
Në këtë lokacion, hetuesit dhe inspektoret konstatojnë se momentalisht në objekt punimet ishin duke u kryer nga vetëm një kompani, rrjedhimisht kryhet vetëm një kontroll.
Të dhëna për punëtorë të hasur në këtë lokacion të ndërtimit në Prishtinë, do të verifikohen nga hetuesit e ATK-së.
Sipas ligjit, ata kontrollojnë nëse punëtorët që janë hasur në vendin e punës, janë të deklaruar në sistemin e ATK-së për deklarimin e taksave.
“Kemi kontrolluar një vendpunishte për punëtorë nëse janë te deklaruar.. janë hasur 9 punëtorë, kemi marrë të dhënat e tyre të cilat më pas do të verifikohen” – tha Afrim Tahiri, inspektor i ATK-së.
Verifikimi i informacioneve se në një biznes ka punëtorë të paregjistruar është një punë specifike e ATK-së. Të dhënat e punëtorëve, numrat e letërnjoftimeve dhe të dhënat nga vëzhgimi grumbullohen nga ATK, për t’u kontrolluar më pas në databazën e raportimeve. Në rast se konstatohen shkelje, atëherë biznesi mund të gjobitet.
Inspektorët dhe hetuesit e Administratës Tatimore të Kosovës, vazhdojnë të kryejnë inspektime për shkeljet e të drejtave të punëtorëve duke trajtuar informacione në baza ditore. Por, për secilin që është pa kontratë të punës, ose kushtet e punës nuk po u respektohen nga punëdhënësi, KALLXO.com është adresa e raportimit.
Raportimi mund të bëhet në faqen e KALLXO.com, në ndarjen – Të drejtat e punëtorëve.
