VIDEO - Zjarr nga bombola e gazit në një shtëpi në Gjakovë, nuk ka të lënduar
Një shtëpi është përfshirë nga zjarri të hënën, më 29.09.2025 i shkaktuar nga një bombolë gazi në Gjakovë.
Rasti ka ndodhur rreth orë 10:40 në një shtëpi në rrugën “Gjon Nikoll Kazazi”.
Sheremet Elezaj, zëdhënës i Policisë për Rajonin e Gjakovës, tha për KALLXO.com se zjarri ka shkaktuar dëme të vogla dhe nuk ka persona të lënduar.
“Rreth orës 10:40, në rrugën ‘Gjon Nikollë Kazazi’ në Gjakovë, është raportuar për një zjarr në një shtëpi banimi, i shkaktuar nga një bombol gazi. Në vendngjarje kanë dalë policia dhe zjarrfikësit, të cilët e kanë lokalizuar zjarrin. Përveç disa dëmeve të vogla në kuzhinën e shtëpisë, pasoja në njerëz nuk ka pasur”- ka thënë Elezaj, për KALLXO.com.
Lokalizimi i zjarrit të shkaktuar nga bombola është bërë i mundur falë reagimit të shpejtë të njësive të zjarrfikësve të Gjakovës.
Përmes faqes së tyre në Facebook, zjarrfikësit e Gjakovë kanë ndarë me publikun informacioneve rreth intervenimit për shuarjen e zjarrit.
“Sot në Gjakovë, është raportuar një rast shpërthimi të një bombole gazi në një shtëpi banimi. Falë reagimit të shpejtë të ekipeve të zjarrfikësve, u arrit të parandalohet shpërthimi i një bombole tjetër, duke shmangur pasoja më të mëdha”- thuhet postimin e zjarrfikësve të Gjakovës.
Sipas tyre, ngjarja përfundoi vetëm me dëme të vogla materiale, pa rrezikuar jetën e banorëve.
