Vendimi i Kushtetueses, Haradinaj: U krijua bazë ligjore për të dalë nga ngërçi

Kryetari i AAK-së, Ramush Haradinaj ka reaguar pasi Gjykata Kushtetuese ka vendosur se seanca konstituive e Kuvendit të Kosovës duhet të përfundojë sa më shpejt dhe jo më vonë se 30 ditë.

Haradinaj u ka bërë thirrje deputetëve të respektojnë vendimin dhe Kosova të dalë nga bllokada institucionale.

Ai tha se me këtë vendim u krijua bazë ligjore për të dalë nga ngërçi.

“Në një situatë të një bllokade totale të krijimit të institucioneve të Republikës së Kosovës, përfshirë edhe konstituimin e Kuvendit, një rast i padëgjuar ky për botën demokratike, kemi kërkuar rrugëdalje në Gjykatën Kushtetuese të Kosovës. Nuk e kemi bërë për interesa partiake, por për interes të vendit dhe të zbatimit të vullnetit të shprehur me votë në zgjedhjet parlamentare të shkurtit të vitit 2025. Këtë kërkesë tonën nuk e kemi shndërruar në çështje e as në kauzë politike” ka shkruar ai në Facebook.

Haradinaj theksoi se prej ditës që e kanë dorëzuar kërkesën në Gjykatë, më 12 maj 2025, “nuk kemi bërë asnjë komunikim publik për epilogun eventual të saj, gjithnjë duke mos dashur të interferojmë në vendimin e Gjykatës.”

“Nuk mund të mos shprehemi të lehtësuar që kërkesa e AAK-së për interpretim dhe zgjidhje nga Gjykata Kushtetuese është pranuar dhe Gjykata ka nxjerrë vendim për këtë çështje, duke krijuar një bazë ligjore për të dalë nga ngërçi i krijuar” theksoi ai.

Haradinaj ka shkruar më tej se duhet t’i hapet rrugë konstituimit të Kuvendit.

“Shfrytëzoj rastin që t’u bëj thirrje të gjithë deputetëve, pa dallim përkatësie politike e partiake, që ta zbatojnë këtë vendim të Gjykatës Kushtetuese dhe t’i hapin rrugë konstituimit të Kuvendit dhe krijimit të institucioneve që dalin nga zgjedhjet e fundit parlamentare” – shkroi kreu i AAK-së.

Gjykata Kushtetuese ka publikuar aktgjykimin në lidhje me seancën konsituive të Kuvendit të Kosovës, pas kërkesës së dërguar në këtë institucion nga deputetët e AAK-së.

Gjykata Kushtetuse ka theksuar se seanca e konstituimit të Kuvendit të Republikës së Kosovës, e filluar më 15 prill 2025, nuk është zhvilluar në pajtim me përcaktimet dhe kërkesat e paragrafit 1 të nenit 66 [Zgjedhja dhe Mandati] të Kushtetutës së Republikës së Kosovës.

Si dhe, më tej Gjykata thekson se deputetët e zgjedhur të Kuvendit të Republikës së Kosovës, duhet që sa më shpejt dhe jo më vonë se 30 ditë të përfundojnë seancën konstituive të Kuvendit duke zgjedhur Kryetarin dhe nënkryetarët e tij.