Tinejxheri bëhet viktima e 16-të e pullazit të shembur të Stacionit të Trenit në Serbi

Një tinejxher i lënduar si pasojë e shembjes së pullazit të Stacionit të Trenit në Novi Sad ka vdekur të premten, më 21 mars 2025 – duke u bërë viktima e gjashtëmbëdhjetë e lidhur me një katastrofë që shkaktoi valë të madhe protestash masive dhe dorëheqjen e Kryeministrit serb – raporton Reuters.

Pacienti i identifikuar nga Spitali Ushtarak i Beogradit vetëm si V.C., 18 vjeç, ishte në mesin e tre personave të lënduar, të cilët ishin shpëtuar nga rrënojat e shembjes së pullazit më 1 nëntor. Njëri prej tyre kishte vdekur gjashtëmbëdhjetë ditë më vonë dhe tjetri mbetet në Spital për trajtim.

“Pavarësisht prej masave të trajtimit… dhe përkushtimit maksimal të stafit të Spitalit Ushtarak, pacienti nuk i përballoi lëndimet e ndërlikuara dhe komplikimet rezultuese.” – ka bërë të ditur Spitali në një Deklaratë të shkruar.

Shumëkush në Serbi e ka lidhur katastrofën e Novi Sadit me korrupsionin e kudondodhur dhe keqmenaxhimin. Autoritetet dhe presidenti populist, Aleksandër Vuçiq, si dhe partia e tij në pushtet, Partia Progresive Serbe, i kanë hedhur poshtë akuzat.

Katastrofa ka shkaktuar gjithashtu një valë protestash masive të studentëve dhe kundërshtarëve të politikave të Qeverisë në mbarë vendin – përfshirë një marshim masiv javën e kaluar në Beograd.

Prokurorët kanë akuzuar 13 persona lidhur me rastin e Novi Sadit dhe Qeveria ka nisur një fushatë kundër korrupsionit. Kryeministri Milosh Vuçeviq dhe dy Ministra dhanë gjithashtu dorëheqje – duke shkaktuar rënien e Qeverisë. Presidenti përballet me detyrën për ta nominuar një Kryeministër të ri, ose të shpallë Zgjedhje të parakohshme.

Përgatiti: Rexhep Maloku – Kallxo.com