Kompania serbe e naftës, me pronësi ruse, i kërkon SHBA-së leje që të vazhdojë operimin

Kompania serbe e naftës NIS, në pronësi ruse, ka kërkuar licencë të veçantë nga Zyra e Kontrollit të Aseteve të Huaja (OFAC) e Departamentit të Thesarit të SHBA-së që të vazhdojë operimin gjatë përpjekjeve të vazhdueshme që të zgjidhë krizën e sanksioneve, ka raportuar të mërkurën (19.11.2025) agjencia e lajmeve, Reuters.

OFAC-i ka i vendosur në janar sanksione sektorit të naftës së Rusisë, por për NIS-in, që operon rafinerinë e vetme të naftës në Serbi, u shtynë disa herë para se të fuqizoheshin më 8 tetor.

“Në përputhje me statusin e negociatave ndërmjet aksionarëve dhe palëve të interesuara, një kërkesë i është paraqitur OFAC-it për licencë të re që do të mundësonte vazhdimin e operacioneve të kompanisë, ndërsa njëherësh po vazhdojnë negociatat për zgjidhje të qëndrueshme për NIS-in”, thuhet në deklaratën e kompanisë.

Uashingtoni po kërkon heqjen dorë prej të gjitha investimeve ruse në NIS dhe pronarëve të kompanisë javën e kaluar iu tre muaj për gjetjen e një blerësi.

“Gazprom Neft” ka 44.9 për qind të aksione të NIS-it dhe “Gazprom” 11.3 për qind, ndërsa Serbia zotëron 29.9 për qind, ndërsa pjesa tjetër janë në duar të aksionarëve më të vegjël.

Bankat kanë ndaluar përpunimin e pagesave të NIS-it dhe JANAF-it të Kroacisë, që ka ndaluar furnizimin e naftës bruto në rafineri. Zyrtarët vlerësojnë se rafineria nuk do të jetë në gjendje të funksionojë përtej 25 nëntorit pa furnizime të reja me naftë të papërpunuar.

Ministrja e Energjisë, Dubravka Gjedoviq Handanoviq, ka deklaruar të mërkurën se qeveria ka miratuar importimin e 38 mijë tonelatave benzinë ​​dhe 66 mijë tonelatave naftë për rezervat shtetërore.

Ndërkohë, guvernatorja e Bankës Qendrore të Serbisë, Jorgovanka Tabakoviq, ka theksuar se OFAC-i e ka paralajmëruar bankën se mund të përballet me sanksione dytësore për shkak të bashkëpunimit të zgjatur me NIS-in.

“Ne kemi marrë një paralajmërim, si një entitet që bashkëpunon me një entitet (tjetër) biznesi që është nën sanksione. Ky është një paralajmërim serioz për ne”, u ka deklaruar Tabakoviq gazetarëve në Beograd.

Pronarët rusë të NIS-it kanë thënë në fillimnëntor se është gati të hiqnin dorë nga kontrolli i kompanisë.

Presidenti populist i Serbisë, Aleksandar Vuçiq, ka deklaruar të dielën se vendi ballkanik synon  të shmangë nacionalizimin e aseteve ruse dhe se është gati të dalë me një ofertë tjetër mbi nivelin e tregut për NIS-in nëse dështojnë negociatat ruse me partnerë të paidentifikuar aziatikë dhe europianë.

Përgatiti: Rexhep Maloku – Kallxo.com