Thaçi: Albin Kurti e ka sajuar vetë kërcënimin, një organizatë e tillë nuk ekziston
Presidenti Hashim Thaçi ka akuzuar kryeministrin në detyrë, Albin Kurti se e ka sajuar kërcënimin ndaj tij, nga një organizatë që veten e quan “Garda Vullnetare Shqiptare”.
“Kur një çështje ngritet në nivel të tillë publik e politik, unë si president i vendit ndjej obligim që të informohem. Mendoj që edhe z. Kurtit ky deklarim mund t’i kthehet bumerang kur e vërteta të dalë në shesh. Ai e di që një kërcënim i tillë nuk ekziston, e di kush e ka formuluar. Kjo është një lojë e ulët nga ana e tij. Kjo është sajuar në selinë e tij. Një dramë të tillë e ka sajuar personalisht ai”, u shpreh ai në intervistë për Klan Kosova.
Presidenti ka deklaruar se ka kërkuar nga institucionet e sigurisë për të kuptuar se a ekziston një organizatë e tillë.
“Mendoj se është një nxitim nga ana e tij në formulimin e këtij postimi. Unë jam konsultuar me të gjitha organet e sigurisë në Kosovë, një organizatë e tillë nuk funksion. Është fiktive. Unë kam pranuar të dhëna zyrtare nga institucionet e Kosovës”, tha presidenti Thaçi në intervistën dhënë në Klan Kosova.
