Serbia padit 13 persona për shembjen e çatisë në stacionin e trenit që la 16 të vdekur

Një prokuror serb ka paditur të martën (16.09.2025) 13 persona, përfshirë një ish-ministër, për rolin e tyre në shembjen e çatisë së stacionit hekurudhor vjet, që ua mori jetën 16 personave dhe shkaktoi me muaj protesta antiqeveritare në mbarë vendin, raporton Reuters.

Ish-ministri i Ndërtimit, Infrastrukturës dhe Transportit Goran Vesiq dhe persona 12 të tjerë, përfshirë ndihmësin e tij dhe kreun e kompanisë hekurudhore, janë paditur me akuzat për siguri publike, ka bërë të ditur zyra e prokurorit në qytetin e Novi Sadit.

Akuza përfshin “vënien në përdorim të ndërtesës së stacionit, edhe pse punimet e ndërtimit ishin duke u zhvilluar dhe se leja (që objekti të përdorej) nuk ishte lëshuar”, thuhet në deklaratë.

Akuzat e tjera përfshijnë “mosmirëmbajtja e strukturës së ndërtesës së stacionit dhe për vepra penale gjatë fazës së projektimit dhe ekzekutimit të rinovimit të ndërtesës së Stacionit Hekurudhor të Novi Sadit”.

Akuza duhet të verifikohet nga një gjykatë. Muaj të tërë protestash në të gjithë Serbinë pas shembjes së çatisë, përfshirë mbylljen e universiteteve, kanë tronditur sundimin e presidentit Aleksandar Vuçiq, ish-ultranacionalist i cili më 2008 u konvertua në kauzën e anëtarësimit në Bashkimin Europian.

Protestuesit, të cilët fajësojnë korrupsionin për katastrofën, kërkojnë zgjedhje të parakohshme që shpresojnë se do ta largojnë Vuçiqin dhe partinë e tij nga pushteti pas 13 vitesh.

Ata akuzojnë Vuçiqin dhe aleatët e tij për lidhje me krimin e organizuar, dhunën kundër rivalëve dhe kufizimin e lirive të medias. Vuçiq i mohon akuzat.

Përgatiti: Rexhep Maloku – Kallxo.com