Së paku 20 të vrarë në njërin prej sulmeve më vdekjeprurëse ruse ndaj Ukrainës perëndimore
Të paktën 20 persona janë vrarë, përfshirë dy fëmijë, në një sulm rus me dron dhe raketa në qytetin e Ukrainës perëndimore, Ternopilit, ku u goditën dy blloqe apartamentesh, thonë zyrtarët vendas, raporton BBC.
66 persona të tjerë janë plagosur, 16 prej të cilëve fëmijë, ka njoftuar policia ukrainase, në njërin nga sulmet më vdekjeprurëse ruse në Ukrainën perëndimore qysh prej nisjes së luftës në shkallë të plotë më 2022.
Janë goditur edhe dy rajonet tjera perëndimore, Lviv dhe Ivano-Frankivsk, dhe një sulm me dron ka pasur në cak tre rrethe të qytetit verior, Kharkiv, duke plagosur më shumë se 30 persona. Fotot e postuara në internet tregojnë ndërtesa dhe makina në flakë.
Ndërprerjet e energjisë elektrike janë shkaktuar në disa rajone në mbarë vendin, ka njoftuar Ministria e Energjisë e Ukrainës.
Presidenti i Ukrainës, Volodymyr Zelensky, ka deklaruar se Rusia ka sulmuar me më shumë se 470 dronë dhe 47 raketa, duke shkaktuar “shkatërrim të konsiderueshëm”. Ai ka paralajmëruar se njerëzit mund të mbeten të bllokuar nën rrënojat në Ternopil.
Një video e shpërndarë nga Zelensky ka treguar se një nga dy blloqet e apartamenteve ishte shembur plotësisht. Ministri i Brendshëm, Ihor Klymenko, ka theksuar se ishte shkatërruar prej katit të tretë deri në të nëntin.
Retë tymi dilnin nga dritaret dhe zjarre të vogla që digjeshin edhe jashtë ndërtesës.
Përgatiti: Rexhep Maloku – Kallxo.com
