Rubio ia shpreh Turqisë shqetësimet pas arrestimit të Kryetarit të Stambollit

Sekretari amerikan i Shtetit, Marco Rubo ka thënë të enjten – sipas kohës lokale amerikane – se ia ka shprehur homologut turk, Hakan Fidan shqetësimet për protestat dhe paraburgimet në Turqi pas arrestimit të kryetarit të Stambollit, Ekrem Imamoglu – raporton Reuters.

Arrestimi i së dielës i Imamoglut, rivalit më të madh politik të presidentit Recep Tayyip Erdogan, lidhur me gjykimin për korrupsion, ka shkaktuar protesta më të mëdha antiqeveritare në dekadën e fundit – duke nxitur edhe arrestimet në mbarë vendin.

“Ne po vëzhgojmë, ne i kemi shprehur shqetësimet, neve nuk na pëlqen të shohim destabilitet të asaj natyre në qeverisjen e cilitdo vend dhe sidomos të një aleati të ngushtë.” – ka deklaruar, Rubio para gazetarëve pas kthimit në Uashington.

“Ne po shohim të njëjtat raporte informative çdo ditë që sheh gjithkush se çfarë po ndodh. Ne jemi të shqetësuar për këto protesta dhe për disa prej raporteve.”

Partia më e madhe opozitare turke ka bërë thirrje që protestat të vazhdojnë. Erdogani i cili është menjëherë pas Imamoglut në disa anketime i ka dënuar protestat si “shfaqje” dhe ka paralajmëruar pasojat legale për protestuesit.

Ministri i Brendshëm turk, Ali Yerlikaya ka bërë të ditur se 1,879 persona janë arrestuar dhe paraburgosur pas shpërthimit të protestave të mërkurën. 26 prej tyre po mbahen në paraburgim, derisa të ketë një Vendim gjykate.

Rubio dhe Fidan janë takuar të martën në Uashington në kohën kur Ankaraja po mundohet t’i afrojë marrëdhëniet me Administratën e presidentit Donald Trump.

Përgatiti: Rexhep Maloku – Kallxo.com