Prokuroria po mbledh informata rreth pretendimeve për keqpërdorim të votave në Shipol të Mitrovicës

Prokuroria e Mitrovicës është duke mbledhur informata lidhur me pretendimet për keqpëdorim të votave në ditën e zgjedhjeve lokale të 12 tetorit në fshatin Shipol të Mitrovicës së Jugut.

“Janë duke u grumbulluar informata lidhur me pretendimet për keqpërdorim të votave në këtë lokacion”- thuhet në përgjigjen e Prokurorisë.

KALLXO.com ka kontaktuar edhe prokuroren Fetije Bajrami për ta pyetur se për çfarë vepre penale bëhet fjalë dhe për sa persona janë duke u grumbulluar informacionet.

Mirëpo, prokurorja, e cila ishte kujdesare në ditën e zgjedhjeve në Mitrovicë të Jugut, nuk u është përgjigjur sot, më 14.10.2025, thirrjeve të KALLXO.com për këtë rast.

Në bazë të rezultateve preliminare të zgjedhjeve të datës 12.10.2025, kandidati i PDK-së, Arian Tahiri, dhe ai i LVV-së, Faton Peci, do të garojnë në rrethin e dytë për të fituar garën për kryetar të Komunës.

Gjithnjë sipas këtyre rezultateve preliminare, në votimet për kandidatët për anëtarë të Kuvendit Komunal, PDK ka fituar 40.43 për qind të votave, LVV 22.67 për qind, Partia Guxo 12.89 për qind dhe LDK 11.94 për qind.

Dje, më 13.10.2025, kryetari i Lëvizjes Vetëvendosje, Albin Kurti, në një konferencë për media ka kërkuar hetime për Exit Poll-et e publikuara për garën për kryetar të Mitrovicës së Jugut.

Ai ka ftuar organet e drejtësisë dhe sigurisë që të merren me këtë çështje.

Në Mitrovicë sipas Exit Poll-it të publikuar në orën 19:00, në ditën e zgjedhjeve, Arian Tahiri i PDK-së ishte renditur i pari me 55.9% të votave, ndërsa kundërkandidati i tij, Faton Peci i LVV-së 39.7%.

E situata ndryshoi më vonë pas publikimit të rezultateve preliminare nga KQZ.