Prokuroria kërkon paraburgim për katër personat e arrestuar në operacionin në Vushtrri
Prokuroria Themelore në Mitrovicë ka kërkuar caktimin e masës së paraburgimit për katër personat e arrestuar gjatë një operacioni të zhvilluar në Vushtrri më 21.09.2025.
Në njoftimin zyrtar thuhet se tre prej tyre, me inicialet Rr.G., A.G. dhe E.G., dyshohen për kryerjen e veprës penale “Detyrimi”, ndërsa i pandehuri me inicialet K.G. dyshohet për veprat penale “Lëndimi i lehtë trupor” dhe “Arratisja e personave të privuar nga liria”.
“Të katër (4) të pandehurit janë arrestuar ditën e djeshme, datë 21 shtator, në një operacion të Prokurorisë Themelore në Mitrovicë, në koordinim me Drejtorinë për Hetimin e Krimit të Organizuar dhe Krimeve të Rënda”- ka bërë të ditur Prokuroria.
KALLXO.com raportoi kur ata u sollën në Gjykatë më 22.09.2025.
Kurse sipas njoftimit të Prokurorisë, operacioni është zhvilluar në fshatin Ropicë dhe në qytetin e Vushtrrisë, ku janë kontrolluar disa lokacione.
Gjatë kontrollit, autoritetet kanë sekuestruar një arsenal të vogël armatimi dhe pajisjesh. “U janë gjetur dhe sekuestruar dy (2) armë të shkurta, 352 copë fishekë të kalibrave të ndryshëm, dy (2) karikatorë, dy (2) palë dylbi, shtatë (7) telefona celularë, një (1) shkop druri, një (1) palë dorëza, një (1) thikë, dokumente të ndryshme, një (1) pasaportë, një (1) patentë shofer, një (1) USB, një (1) llap-top, një (1) palë patika dhe një (1) çelës motori” – thuhet në komunikatë.
Tashmë, katër të pandehurit kanë arritur në degën e Gjykatës në Vushtrri, teksa seanca për caktimin e masës së sigurisë, pritej të niste nga ora 15:00, ndërsa e njëjta do të jetë e mbyllur për publikun.
https://kallxo.com/lajm/arrestohen-anetare-te-familjes-gerbeshi-ne-ropice-te-vushtrrise-per-fajde-e-detyrim/
