Prokuroria kërkon arrest shtëpiak për personin i cili dyshohet se falsifikoi dokumente në tenderin në Gjilan

Prokuroria Themelore në Gjilan i ka kërkuar Gjykatës Themelore të Gjilanit që ndaj D. Etemit të caktohet masa e arrestit shtëpiak, për shkak të dyshimit se ka kryer veprën penale “keqpërdorimi dhe mashtrimi në prokurim publik”, të Kodit Penal të Republikës së Kosovës.

Kjo u konfirmua nga zëdhënësja e Prokurorisë Themelore të Gjilanit, Liridona Xheladini.

“Ju njoftojmë se Prokuroria Themelore në Gjilan, Departamenti për Krime të Rënda, ndaj të pandehurit D.E. ka kërkuar caktimin e masës së arrestit shtëpiak nga Gjykata Themelore në Gjilan.” – thuhet në përgjigjen e Gjykatës së Gjilanit.

D.Etemi u arrestua më 14.04.2025 në Gjilan për “falsifikim të dokumenteve në prokurim publik”, si personi i autorizuar nga grupi i Operatorëve, i përbërë nga “Fortesa” SH.P.K. si lidere, “AlbaProject” dhe “Auremont”.

https://kallxo.com/lajm/arrestimi-ne-gjilan-ka-te-beje-me-tenderin-per-te-cilin-prokuroria-nisi-hetimet-pas-raportimit-te-kallxo-com/

Sipas Policisë, ai dyshohet se ka paraqitur dokumente me përmbajtje të rreme apo të falsifikuara për t’i plotësuar kërkesat, në mënyrë që të përfitojë kundërligjshëm në fonde publike, sipas ofertës së çmimit nga shuma e përgjithshme e vlerës së parashikuar prej 400,000 eurosh.

KALLXO.com kishte raportuar më 31.01.2025 se si kompania “Fortesa” SH.P.K. ishte futur në “listë të zezë” nga Organi Shqyrtues i Prokurimit Publik për “falsifikim të vulës” dhe “nënshkrimit në tenderin e Komunës së Gjilanit” për “rregullimin e rrugëve të arave për nevojat e bujqësisë”.

Edhe përkundër kësaj, as Komuna e Gjilanit e cila ishte inicuese e tenderit e as Organi Shqyrtues i Prokurimit, i cili më 08.11.2024 e ka vendosur Kompaninë në “listë të zezë” nuk e kanë dërguar këtë rast në Prokurorinë e Shtetit.

Rasti ishte regjistruar nga Prokuroria e Gjilanit dhe i është ndarë një Prokurori, vetëm pasi KALLXO.com është interesuar dhe ka dërguar pyetje.

https://kallxo.com/gjate/oshp-e-vendosi-ne-liste-te-zeze-per-falsifikim-te-vules-dhe-nenshkrimit-prokuroria-inicion-rast-pas-interesimit-te-kallxo-com/