Prezantohet programi për mësimin tërëditor në pesë shkolla të Prishtinës

Komuna e Prishtinës ka prezantuar sot, më 15.08.2024, programin mësimor tërëditor për pesë shkollat fillore në kryeqytet.

Shkollat të cilat do ta zbatojnë këtë program nga shtatori i këtij viti janë: “ Xhemail Mustafa”, “Faik Konica”, “Shkolla e Gjelbër”, “Nazim Gafurri” dhe “Qamil Batalli”.

Kryetari i Komunës së Prishtinës, Përparim Rama, gjatë prezantimit të këtij programi tha se po jetësohet reforma më e madhe e arsimit dhe një ndër premtimet me të rëndësishme në fushën e arsimit.

“Reforma arsimore më e madhe e nisur ndonjëherë në kryeqytet këtë shtator do të jetësohet. Sot po realizohet njëra ndër premtimet më të rëndësishme në fushën e arsimit. Nga shtatori do të filloj mësimi tërëditor për nxënësit e shkollave të  Kryeqytetit”, – ka deklaruar Rama.

Ai njoftoi së për realizimin e këtij premtim është dashur të punohet në investimin infrastrukturor dhe në krijimin e hapësirave shtesë.

“Kemi investuar në përmirësimin e infrastrukturës shkollore, në krijimin e hapësirave shtesë, në sigurim të shujtave, në staf të kualifikuar për aktivitete dhe sigurim të mjeteve didaktike”, shpjegoi Rama

Nder të tjera, ai foli edhe për ndikimin pozitiv që do behët më programin e mësimit tërëditor.

“Mësimi tërëditor do të ketë impakt pozitiv në përmirësimin e komunikacionit në kryeqytet pasi prindërit do të bëjnë më pak lëvizje për te dërguar dhe për të marr nga shkolla fëmijët e tyre dhe mbi të gjitha do të ketë edhe më pak stres tek prindërit, sepse nuk do te kenë nevojë që në mes të ditës te shkojnë t’i marrin fëmijët e tyre”- ka thënë Rama

Ndërsa drejtoresha e Arsimit në Komunën e Prishtinës, Jehona Lushaku, njoftoi së finalizimi i këtij programi është mundësuar pas bashkëpunimit me drejtorët e këtyre pesë shkollave dhe analizimin e të gjitha shkollave në Prishtinë.

“Kemi arritur me një punë të madhe së bashku me drejtorët e shkollave të finalizojmë një reformë të planifikuar për këtë vit shkollor, e cila synim kryesor ka realizimin e mësimit tërëditor. Kemi bërë një analizë të gjitha shkollave të Prishtinës, kemi analizuar numrin e nxënësve të Prishtinës, numrin e shkollave dhe shtrirjen e tyre gjeografike “- ka deklaruar Lushaku

Sipas programit mësimor tërëditor për këto shkolla është bërë edhe një model specifik i orarit, ku në këtë orar parashihet edhe dreka e cila do të ofrohet për nxënësit e këtyre pesë shkollave nga Komuna e Prishtinës.

“Modeli i orarit mësimor fillon në orën 07:45 për shkak të mobilitetit të trafikut. Orari për klasat një dhe dy do të përfundoj në orën 14:00 ndërsa për klasat tre dhe pesë do të përfundoj në orën 15:45. Komuna ka ndarë 1.7 milion euro në vit për shujta e drekës për nxënësit e pesë shkollave me program tërëditor”, – ka njoftuar Lushaku.

Gjithashtu drejtoresha e Arsimit në Prishtinë ka folur edhe për vështirësitë që kanë qenë gjatë finalizimit të kësaj reforme arsimore.

“Vështirësia kryesore ka qenë mbingarkesa që kemi në shkollat tona dhe si rezultat i kësaj kemi ardhur te një model në ndarjen e shkollave në cikle siç parashihet edhe me legjislacionin në fuqi e që është zgjidhja e duhur”- ka thënë Lushaku.

Në këtë prezantim, ajo foli edhe për ndarjen e shkollave më qëllim që të mundësohet realizimi i kësaj reforme, ku përmendi bartjen dy gjimnazeve, “Xhevdet Doda” dhe “Eqrem Qabej” në “Gjimnazin Matematikor” dhe  gjimnazin “Ahmet Gashi”.

“Shkollat janë ndarë më qëllim që të realizohet mësimi tërëditor dhe të krijohet më shumë hapësira për nxënësit e klasave të para deri të pestën, nxënësit nga klasat gjashtë deri të nëntën lëvizin në shkollën më të afërt që është e lirë. Për t’u realizuar kjo reformë është dashur të lëvizim dy gjimnaze, gjimnazi ‘Xhevdet Doda’ dhe ‘Eqrem Qabej’ dhe këto objekte do ti përdorim për klasat e gjashtë dhe nëntë. Nxënësit e gjimnazit ‘Xhevdet Doda’ do lëvizin në ‘Gjimnazin Matematikor’ ndërsa nxënësit e gjimnazit ‘Eqrem Qabej’ do të lëvizim në gjimnazin ‘Ahmet Gashi’”,- ka deklaruar Lushaku

Ky program parasheh edhe lëndë  të reja inovative shtesë për nxënësit e këtyre shkollave.

“Do të ketë orë të veçanta për lexim kuptimin edhe kodimi do të jetë si një lëndë innovative dhe në program do të ketë aktivitete të eksperimenteve shkencore”, njoftoi Lushaku.