Kryetari Rama: Fillon alokimi i pjesshëm i 25 milionë eurove nga Ministria e Financave
Kryetari i Kryeqytetit, Përparim Rama, ka njoftuar sot se Ministria e Financave ka nisur alokimin e pjesshëm të mjeteve financiare në vlerë prej 25 milionë euro nga bartja e vitit 2024, fonde që janë të destinuara për projektet dhe obligimet e Komunës së Prishtinës.
Rama e ka quajtur këtë zhvillim si “lajm të mirë për qytetarët dhe punëtorët e Kryeqytetit”, duke bërë të ditur se procesi i alokimit është tashmë në fazën e parë dhe se komuna do të vazhdojë punën pa ndërprerje për t’i procesuar pagesat.
Sipas tij, Drejtoria e Financave e Kryeqytetit sot do të punojë jashtë orarit zyrtar për të siguruar që pagesat të kryhen sa më shpejt.
“Në përputhje me dinamikën e alokimit të mjeteve nga Ministria, ne si komunë do të vazhdojmë me procesimin e pagesave në mënyrë të vazhdueshme dhe të rregullt.”- ka deklaruar Rama.
Ai ka shtuar se komuna pret që shumë shpejt të përfundojë alokimi i plotë i shumës prej 25 milionë euro nga Ministria e Financave.
Në fund, kryetari ka falënderuar qytetarët dhe punëtorët për durimin dhe bashkëpunimin gjatë ditëve të vonesave dhe proceseve buxhetore.
“Falënderojmë qytetarët dhe punëtorët për mirëkuptimin, durimin dhe bashkëpunimin.”- ka theksuar Rama.
https://kallxo.com/lajm/ministria-alokon-2-7-milione-euro-per-trafikun-urban-murati-kundershton-akuzat-e-komunes/
