Presidentja Osmani takoi të dërguarin e posaçëm të Francës, kërkoi heqjen urgjente të masave të vendosura ndaj Kosovës

Presidentja e Kosovës, Vjosa Osmani, ka pritur në takim të dërguarin e posaçëm të Francës për Ballkanin Perëndimor, ambasadorin René Troccaz.

Gjatë këtij takimi, në të cilin u diskutuan zhvillimet e fundit në vend, duke folur për hapjen e urës së re mbi lumin Ibër, presidentja Osmani ka theksuar se urat nuk shkaktojnë tension por veprimtaria kriminale e Millan Radoiçiqit.

“Është veprimtaria kriminale dhe destabilizuese e Radojçiqit dhe grupeve kriminale në veri që pengonte normalitetin dhe lëvizjen e lirë, duke krijuar atmosferë frike dhe tensioni , e jo urat”- ka thënë Osmani sipas komunikatës së Presidencës.

“Presidentja Osmani theksoi se mirëpret ndërtimin e tyre, duke vënë në pah rolin pozitiv që urat luajnë në integrimin, bashkimin dhe afrimin e qytetarëve, përmes lehtësimit të lëvizjes, bashkëpunimit dhe transportit. Ajo rikujtoi më tej se mbyllja e urës kryesore në Mitrovicë në vitin 1999 nuk ishte bërë për çështje sigurie por për shkak të vendimeve jashtëzakonisht të dëmshme politike dhe se është për keqardhje që edhe 26 vite pas mbylljes e tashmë 10 vite pas marrëveshjes së Brukselit për hapjen e urës, ende ajo mbetet e mbyllur”- thuhet në komunikatë.

Sa u përket masave kufizuese të Bashkimit Europian ndaj Kosovës, presidentja Osmani i quajti të padrejta dhe të paarsyeshme duke theksuar se ato dëmtojnë proceset demokratike dhe zhvillimin e vendit si dhe dëmtojnë kredibilitetin e dialogut të udhëhequr nga BE-ja.

Presidentja Osmani gjatë takimit ka përsëritur orientimin strategjik të Kosovës drejt integrimit në Bashkimin Europian dhe NATO, si dhe përkushtimin e palëkundur për anëtarësim në Këshillin e Europës, duke theksuar se reformat, sundimi i ligjit dhe përputhja me standardet europiane mbeten prioritetet kryesore.