Policia gjeti mbi 6 kilogramë marihuanë në banesën e një të kërkuari për një vrasje në Prishtinë

Policia ka njoftuar se gjatë bastisjes në banesën e një të kërkuar për vrasje të ndodhur në viti 2024, ka gjetur droga të llojeve të ndryshme.

Të enjten, më 10.07.2025, rreth orës 20:35, Policia ka arritur ta lokalizojë një të kërkuar për një vrasje që ka ndodhur në vitin 2024 dhe gjatë kontrollit në një banesë, ku dyshohet se gjendej i dyshuari në “Lagjen e Spitalit” në Prishtinë, gjeti dhe sekuestroi një sasi të drogave të llojit marihuanë e kokainë, një karikatorë e këllëf arme.

Policia gjeti mbi 6 kilogramë marihuanë, 38.3 gramë kokainë, 0.9 gramë drogë e llojit tusi e 0.4 gramë ekstazi.

“Njësitë policore gjatë kontrollit në banesën ku banonte i dyshuari mashkull kosovar, i cili kishte urdhër arrest lidhur me një rast vrasje, kanë gjetur dhe sekuestruar: një sasi prej 6 kilogramë e 172.6 gramë substancë e dyshuar narkotike të llojit marihuanë, 38.3 gramë substancë e dyshuar narkotike e llojit kokainë, 0.9 gramë substancë e dyshuar narkotike e llojit tusi, 0.4 gramë substancë e dyshuar narkotike e llojit ekstazi, një peshore digjitale, një karikator, një këllëf i armës” – thuhet në njoftimin e Policisë së Kosovës.

Po ashtu, Policia ka gjetur dhe konfiskuar edhe para në vlerë prej 1 mijë euro, 20 franga, 110 denarë të Maqedonisë së Veriut, dhe 50 dinarë serb.

Po, sipas Policisë në cilësi të provës është sekuestruar edhe një telefon mobil.

Në konsultim me prokurorin, pasi i dyshuari gjendet në trajtim mjekësor në Qendrën Klinike Universitare të Kosovë (QKUK) lidhur me një rast vrasje, thuhet më tej në njoftimin e Policisë, rasti procedohet me procedurë të rregullt.

KALLXO.com raportoi të enjten, më 10.07.2025, se Policia kishat arritur ta lokalizojë një të kërkuar për një vrasje që ka ndodhur më 26.03.2024, i cili me qëllim që t’i ikte arrestimit është hedhur nga kati i katëri objektit banesor ku jetonte, në Lagjen e Spitalit.

“Njësitë policore kanë arritur ta lokalizojnë të dyshuarin mashkull kosovar, i cili ishte në kërkim ndërkombëtar lidhur me rastin e ndodhur më 26.03.2024. I dyshuari me qëllim që t’i shmanget arrestimit nga policia, është hedhur nga kati i katërt, si pasojë e kësaj ka pësuar lëndime trupore” – ka thënë policia.

I dyshuari, sipas Policisë  është dërguar për trajtim mjekësor në QKUK në Prishtinë dhe është në mbikëqyrje policore.