Ekstradohet nga Shqipëria një i kërkuar për kultivim të bimëve narkotike, Prokuroria e Gjakovës kërkon 30 ditë paraburgim

Prokuroria e Gjakovës ka kërkuar nga Gjykata paraburgim prej 30 ditësh ndaj të pandehurit me inicialet N. Sh., shtetas i Shqipërisë, për shkak të dyshimit të bazuar se ka kryer veprën penale – kultivim i bimëve narkotike.

Sipas njoftimit të Prokurorisë, i pandehuri i cili ishte në arrati është arrestuar nga autoritet shqiptare dhe më pas është ekstraduar për në Kosovë.

I pandehuri, sipas Prokurorisë, në bashkëpunim edhe me një person tjetër kanë kultivuar tri parcela me bimë narkotike.

“Sipas kërkesës së Prokurorisë, ndër të tjera ceket se ekziston dyshimi i bazuar se i pandehuri me inicialet N. Sh., nga data e pa vërtetuar deri më datë 19.06.2024, në fshatin Panorc, Komuna Malishevë, në bashkëveprim më të pandehurin O. Sh., kanë kultivuar në tri (3) parcela me rreth 1259 bimë, narkotik të llojit kanabis sativa në vendin e lartcekur të cilat parcela janë identifikuar përmes vëzhgimit me dron nga ajri”- thuhet në njoftimin e Prokurorisë së Gjakovës.

Sipas Prokurorisë, i pandehuri kërkohej më urdhër ndërkombëtar.