Për çka dhe sa kishte qenë i dënuar Nexhat Krasniqi, i sanksionuari nga SHBA?
Departamenti amerikan i Shtetit e ka sanksionuar Nexhat Krasniqin, shef i prokurimit në Ministrinë e Mjedisit, Planfikimit Hapësinor dhe Infrastrukturës.
DASH e ka caktuar si “të papërshtatshëm për hyrje në Shtetet e Bashkuara, për shkak të përfshirjes së tij në korrupsion të madh”.
Por në çka kishte qenë i përfshirë ?
Rasti kishte të bënte me realizimin e Parkut Industrial në Drenas, ku Krasniqi akuzohej se në cilësinë e zyrtarit kishte pranuar ryshfet nga kompania “Eltoni” lidhur me dhënien e lejes së ndërtimit.
Lidhur me këto akuza, Nexhat Krasniqit i ishte shqiptuar dënim prej 26 muaj burgim më 21 shtator të vitit 2015 për keqpërdorim të detyrës zyrtare nga Gjykata Themelore e Prishtinës.
Për të ardhur deri te ky aktgjykim, në Gjykatën Themelore të Prishtinës lidhur me këtë rast ishin mbajtur 22 seanca gjyqësore.
Aktakuza ishte ngritur më 5 nëntor të vitit 2015 për shpërdorim të detyrës zyrtare dhe mashtrim.
Ndaj dënimit të themelores prej 26 muajsh burgim, Nexhat Krasniqi i ishte drejtuar Gjykatës së Apelit, e cila e kishte ndryshuar edhe lartësinë e dënimit edhe cilësimin juridik të veprës penale.
Apeli më 2 maj të vitit 2016 ia zvogëloi dënimi Krasniqit në 18 muaj burgim me kusht për veprën penale – keqërdorim i detyrës zyrtare.
Avokati i Krasniqit, Florent Latifaj, ka thënë për Kallxo.com se për rastin në fjalë ka arritur afati për rehabilitimin gjyqësor dhe është i fshirë nga evidenca.
Trupi gjykues që mori këtë aktgjykim kishte qenë i përbërë nga gjyqtari i EULEX-it Radostin Petrov në cilësinë e kryetarit dhe gjyqtarit raportues, pastaj gjyqtarja e EULEX-it Hajnalka Veronika Karpati dhe gjyqtari kosovar i Gjykatës së Apelit, Driton Muharremi, në cilësinë e anëtarëve të kolegjit.
Edhe me këtë aktgjykim Nexhat Krasniqi nuk kishte qenë i kënaqur duke iu drejtuar Supremes me kërkesë për mbrojtje të ligjshmërisë.
Në shkurt të vitit 2017 Supremja ia refuzoi kërkesën.
Gjykata Supreme kishte konstatuar se aktgjykimet e mëparshme (të Themelores dhe Apelit) nuk kishin qenë me shkelje të dispozitave procedurale siçc kishte pretenduar paraqitësi i kërkesës, Nexhat Krasniqi.
Ky rast ka marrë përgjigje deri në Gjykatën Kushtetuese.
Në shkurt të vitit 2018 kjo Gjykatë vlerësoi se Nexhat Krasniqi kishte bërë kërkesë të papranueshme.
Përbërja e Kushtetueses është si vijon; Arta Rama-Hajrizi, kryetare, Ivan Cukalovic, zevendeskryetar, Altay Suroy, gjyqtar, Almiro Rodrigues, gjyqtar, Snezhana Botusharova, gjyqtare, Bekim Sejdiu, gjyqtar, Selvete Gerxhaliu-Krasniqi, gjyqtare dhe Gresa Caka-Nimani, gjyqtare.
Sipas dosjes së kësaj Gjykate, Gjykata e Apelit dhe Gjykata Supreme në aktgjykimet e tyre kanë dhënë arsyetime të qarta dhe të hollësishme.
“Gjykata thekson se nuk është detyrë e Gjykates Kushtetuese të merret me gabimet e faktit ose të ligjit që pretendohet të jenë bërë nga gjykatat e rregullta gjatë vlerësimit të provave apo zbatimit të ligjit (ligjshmëria), përvec; dhe per aq sa ato të mund të kenë shkelur të drejtat dhe liritë e mbrojtura me Kushtetute (kushtetutshmëria)” – përshkruhet në arsyetimin e Kushtetueses.
Pjesë e aktgjykimit kishte qenë edhe biznesmeni, pronari i kompanisë “Eltoni”, Hilmi Bellopoja, i cili ishte liruar nga akuza sepse vepra për të cilën ai akuzohej – falsifikim i dokumenteve, ishte vjetërsuar për hiç më pak se katër vite.
