Foto: Marco Rubio/X
Takimi Rubio – Gjuriq, paralajmërohet dialog strategjik mes SHBA-së dhe Serbisë
Departamenti amerikan i Shtetit ka njoftuar për takimin që Sekretari i Shtetit, Marco Rubio, zhvilloi me ministrin e Punëve të Jashtme të Serbisë, Marko Gjuriq.
Sipas komunikatës së Departamentit të Shtetit, të lëshuar më 06.08.2025, në këtë takim është biseduar për mundësinë që Shtetet e Bashkuara dhe Serbia t’i thellojnë lidhjet ekonomike dhe ato të sigurisë.
“Sekretari i Shtetit Marco Rubio u takua me ministrin e Jashtëm serb, Marko Gjuriq. Ata ranë dakord që Shtetet e Bashkuara dhe Serbia do të zhvillojnë një dialog strategjik dypalësh më vonë këtë vit për të thelluar lidhjet ekonomike dhe të sigurisë” – thuhet në komunikatë.
Po ashtu, sipas kësaj komunikate, në takim është diskutuar edhe për rëndësinë e uljes së tensioneve në Ballkanin Perëndimor.
“Ata diskutuan gjithashtu rëndësinë e uljes së tensioneve në Ballkanin Perëndimor, veçanërisht me Kosovën dhe në Bosnjë dhe Hercegovinë, për të çuar përpara stabilitetin rajonal dhe për të përgatitur terrenin për rritje ekonomike dhe prosperitet” – thuhet mes tjerash në komunikatë.
Në fund u theksua se “Shtetet e Bashkuara janë të përkushtuara për një marrëdhënie të dobishme reciprokisht me Serbinë që u shërben qytetarëve tanë dhe interesave tona”.
Ndërkohë, sipas Radio Evropa e Lirë, Gjuriq tha pas takimit për mediat serbe se kjo vizitë ishte mundësi e madhe për Serbinë për ta filluar bashkëpunimin strategjik me Administratën e presidentit Donald Trump herët dhe si vendi i parë në rajon.
“Mendoj se do të shohim më shumë rezultate dhe hapa më konkretë në javët dhe muajt në vijim. Vetë fakti që unë jam praktikisht ndër të parët nga pjesa jonë e botës si ministër këtu është një akt respekti dhe një dëshirë e sinqertë për të ndryshuar diçka për mirë” – tha Gjuriq për Tanjug, raporton Radio Evropa e Lirë.
Ai tha gjithashtu se “kemi parë se ka një oreks i madh” për të thelluar bashkëpunimin ekonomik përmes projekteve konkrete në fushën e energjisë, infrastrukturës, teknologjive të reja, shkencës, bashkëpunimit në fushën e arsimit dhe kulturës.
