Pa paga, punëtorët e RTK-së paralajmërojnë grevë të përgjithshme nga java e ardhshme
Sindikata e Punëtorëve të RTK-së ka njoftuar se nga java e ardhshme, më 23.11.2025, do të fillojë grevë e përgjithshme në mediumin publik në rast se kërkesa e tyre për ekzekutim të pagave nuk realizohet.
“SPERTK njofton se greva e përgjithshme në RTK do të fillojë të hënën, duke shënuar nisjen e masave sindikale për shkak të mosshpërndarjes së pagave dhe neglizhencës së institucioneve për zgjidhjen e krizës së rëndë financiare në transmetuesin publik.” – thuhet në komunikatën e SPERTK-së në Facebook më 18.11.2025.
Tutje, sindikata bëri të ditur se po kërkon nga menaxhmenti dhe bordi i RTK-së që të marrin një vendim të qartë për mosmbulimin e asnjë ngjarjeje politike në Kosovë deri në realizimin e kërkesave legjitime të punëtorëve.
“Si shenjë proteste, SPERTK kërkon që në ekranin e RTK-së çdo ditë të shfaqet njoftimi “Punëtorët e RTK-së pa paga”, derisa të zgjidhet situata.”” – thekson SPERTK-ja.
Ndërkaq, kjo sindikatë paralajmëroi edhe protesta para Qeverisë e Kuvendit si vazhdim të presionit sindikal ndaj institucioneve të vendit dhe fajtorë për këtë krizë i konsideroi të gjitha partitë politike.
“Ne i bëjmë thirrje Kryeministrit Kurti dhe të gjitha partive politike që të ndërmarrin menjëherë masa konkrete dhe të alokojë buxhetin e RTK-së, sipas ligjit, pasi RTK është institucion publik dhe funksionimi i tij nuk mund të lihet në krizë financiare.” – thanë ata.
Derisa treguan se nuk do të tolerojnë më një gjë të tillë, ata thanë se dita-ditës masat do të ashpërsohen edhe më tepër deri sa kërkesat e tyre të realizohen plotësisht.
Punëtorët e Radiotelevizionit të Kosovës protestuan para disa ditësh, më 06.11.2025 dhe më 10.11.2025 për të kërkuar miratim të buxhetit dhe alokim të pagave.
Ditë më parë, kryetari i Kuvendi të Kosovës, Dimal Basha e quajti padrejtësi situatën me punëtorët e RTK-së, ndërsa tregoi se ka ftuar të gjitha subjektet politike për mirëkuptim ndaj miratimit të raportit për RTK-në.
“Unë dola këtu me u solidarizu me punëtorët e RTK-së, ku janë mbi 700 prej tyre të cilët i presin pagat dhe pa të drejtë kanë mbetur pa paga. Megjithatë, unë gjithashtu e kam me rëndësi t’ju njoftoj si Kryetar i Kuvendit, që i kam ftuar të gjitha subjektet politike për të bërë hapat që duhet, për të arritur deri te një mirëkuptim për miratimin e raportit” – theksoi Basha.
Ndërsa, herën e fundit ata protestuan më 13.11.2025, me ç’rast paralajmëruan grevën njëorëshe që u mbajt më 17.11.2025.
Pas kësaj, presidentja e vendit, Vjosa Osmani, më 15.11.2025 nëpërmjet një letre i ka kërkuar kryeparlamentarit, Dimal Basha, për të adresuar vonesat në pagesat e pagave të mbi 700 punëtorëve të Radiotelevizionit të Kosovës, si pasojë e mosformimit të Komisionit për Buxhet dhe Financa në legjislaturën e re.
Mospagesa ka mbetur peng për shkak të mosformimit të komisionit parlamentar për shqyrtim dhe miratim të raportit për RTK-në.
Edhe në gusht 2025, punëtorët e RTK-së patën protestuar për paga. Pas situatës, Qeveria në detyrë e Kosovës, më 15.08.2025 e kishte miratuar në parim kërkesën për huamarrje deri në 2,540,000 euro të Radiotelevizionit të Kosovës (RTK) për qëllime të likuiditetit të transmetuesit publik.
Më 17.11.2025 rreth situatës në RTK u deklarua edhe nënkryetarja e Kuvendit nga LVV-ja, Albulena Haxhiu. Sipas saj tash që ka Kuvend të konstituuar “nuk ka sens të vazhdohet me huadhënie të tjera” për RTK-në.
