Hundozi falënderon stafin e RTK-së që me durim, besim e përkushtim kontribuoi në ruajtjen e funksionimit të institucionit
Pas ndarjes së mjeteve nga Qeveria e Kosovës për ekzekutimin e pagave për 700 punëtorët e RTK-së ushtruesi i detyrës së drejtorit të Radiotelevizionit të Kosovës, Hysen Hundozi, ka falënderuar stafin e mediumit publik për durimin që kanë pasur dhe për kontributin e dhënë në funksionimin e tij.
“E di që kjo periudhë ka qenë sfiduese për institucionin tonë, dhe dua t’i falënderoj të gjithë ata që, me besim, durim dhe përkushtim, kanë kontribuar në ruajtjen e funksionimit të RTK-së” – ka shkruar ai në Facebook.
Hundozi tha se ky vit përfaqëson punën e punëtorëve me sfida financiare.
“Gjatë këtij viti kemi punuar në rrethana të jashtëzakonshme, duke u përballur me sfida të rënda financiare. Megjithatë, puna ka vazhduar me avancime të dukshme në raportet me punëtorët, forcimin e ligjshmërisë dhe hapjen ndaj bashkëpunimit me partnerë vendorë e ndërkombëtarë” – shtoi Hundozi.
Ndërkaq theksoi se pas konsituimit të Kuvendit të ri, ata do të angazhohen në gjetjen e një zgjidhjeje të qëndrueshme për financimin e RTK-së.
“Pas konstituimit të Kuvendit të ri që do të dalë nga zgjedhjet parlamentare, do të angazhohemi maksimalisht për të gjetur zgjidhje ligjore dhe të qëndrueshme për financimin, pronën dhe çështjet e tjera jetike për RTK-në” – theksoi ai.
Ndërsa shtoi se kanë një vizion të qartë dhe konkret për të ardhmen e RTK-së “si një transmetues i mirëfilltë publik dhe do të punojmë me vendosmëri e përkushtim për ta realizuar atë.”
Qeveria në detyrë në mbledhjen e mbajtur më 27.11.2025 ka ndarë mjetet për pagat e punëtorëve të Radiotelevizionit të Kosovës në vlerë mbi 4 milionë euro.
Punëtorët e Radiotelevizionit të Kosovës kanë vazhduar edhe sot, më 27.11.2025, grevën e përgjithshme nga ora 11:00 deri në ora 13:00.
Për shkak të grevës nuk të pati transmetim të edicioneve të lajmeve të orës 11:00.
Punëtorët e mediumit nuk e kanë marrë ende pagën e tetorit.
Mospagesa pati mbetur peng për shkak të mosformimit të komisionit parlamentar për shqyrtim dhe miratim të raportit për RTK-në.
