"Nga toka fillon gjithçka" - Presidentja Vjosa Osmani shtron Darkën e Lamës
Presidentja e Kosovës, Vjosa Osmani, ka njoftuar për mbajtjen e Darkës së Lamës, një traditë e cila simbolizon përfundimin e sezonit të korrjeve dhe falënderimin për bereqetin e tokës. Kjo darkë e mbajtur më 20.10.2025, u organizua nën patronazhin e Presidentes, Vjosa Osmani.
Përmes një statusi në rrjete sociale, Osmani bëri të ditur se kishte ftuar miq, aleatë, si dhe përfaqësues të jetës institucionale e shoqërore, ndërsa ka ndarë edhe fotografi nga mbrëmja ku janë shfaqur elemente të kulturës dhe trashëgimisë tradicionale shqiptare.
“Nga toka fillon gjithçka: jeta, bereqeti dhe begatia. Bashkë me miq, aleatë, përfaqësues të jetës institucionale e shoqërore, në Darkën e Lamës shpreha falënderimin dhe mirënjohjen time të thellë për secilin prej atyre që e mbajnë këtë vend gjallë e krenar çdo ditë”- ka shkruar Presidentja Vjosa Osmani, në Facebook.
Presidentja ka theksuar se kjo traditë është e nisur nga ish-presidenti i Kosovës, Ibrahim Rugova, dhe se ajo mbetet një kujtesë e lidhjes së popullit me tokën dhe rrënjët e tij.
“Kjo Darkë e Lamës, e cila është nismë e Presidentit historik të Kosovës, Dr. Ibrahim Rugova, është kujtesë e lidhjes sonë me rrënjët, me tokën që na mban e ushqen, me traditën që na mëson të jemi mirënjohës”- ka shkruar Osmani mes tjerash.
Darka e Lamës është mbajtur për herë të parë si ngjarje shtetërore në fillim të viteve 2000, në kohën e presidentit Rugova, dhe prej atëherë është shndërruar në një simbol të mirënjohjes për punën bujqësore dhe trashëgiminë kulturore të vendit.
Tradicionalisht, shtrimi kësaj darke bëhet nga presidenca, teksa në sofrat, ku mysafirë rëndom janë krerë institucionesh nga vendi e ndërkombëtarë, shtrohet ushqim tradicional.
