Në palestrën e Mitrovicës së Veriut largohen ulëset me ngjyrat e flamurit të Serbisë

Ulëset me ngjyrat e flamurit të Serbisë në palestrën sportive në Mitrovicë të Veriut sot, më 02.10.2025 janë zëvendësuar me ngjyrat që simbolizojnë qytetin e Mitrovicës.

Nga bardh, kaltër e kuq, ulëset u bënë gjelbër e bardh.

Për këtë ndryshim njoftoi Erden Atiq, kryetar i kësaj Komune, i cili tha se ky investim nuk është vetëm ndryshim estetik, por sipas tij, është dëshmi e vizionit për një Mitrovicë Veriore më dinamike, më të bukur dhe me më shumë hapësira që bashkojnë njerëzit përmes sportit dhe kulturës.

“Salla sportive tashmë është e rinovuar me ulëset e reja gjelbër e bardh, duke sjellë një pamje moderne, më komode dhe mikpritëse për të gjithë sportistët dhe qytetarët”- shkroi Atiq.

KALLXO.com raportoi paraprakisht për ndryshimin që do të bëhej në këtë palestër.

“Në palestër po zëvendësohen uleset, po largohen ato me ngjyra të Serbisë e po zëvendësohen me ulëset me ngjyra të qytetit, gjelbër dhe bardh”- ka thënë Visar Syla, shefi i kabinetit të kryetarit Atiq.

Gjithashtu KALLXO.com raportoi edhe për një aksion të Drejtorisë së Inspektoratit në këtë komunë.

Mbishkrimi “Kosovska Mitrovica” i shkruar me shkronja cirilike u zëvendësua me “Mitrovica” tashmë me shkronja latine.

https://kallxo.com/lajm/largimi-i-mbishkrimit-kosovska-mitrovica-ne-mitrovice-te-veriut/