Në Mitrovicë të Veriut vihet guri i themelit të një shkolle, projekti do të kushtojë mbi 4.1 milionë euro

Pasditën e së premtes, më 03.10.2025, në Mitrovicë të Veriut, përkatësisht në Lagjen e Boshnjakëve, është vendosur guri i themelit për ndërtimin e shkollës.

Kryeministri në detyrë i Kosovës, Albin Kurti, tha se kjo shkollë do të ketë nëntë klasa të shkollës fillore dhe një klasë e çerdhes për fëmijë.

Ndërkaq projekti do të kushtojë rreth 4 milionë e 152 mijë euro.

Projektim është investim i Ministrisë së Arsimit, Shkencës, Teknologjisë dhe Inovacionit.

Pranvera e vitit 2027, sipas Kurtit, do të jetë koha kur do t’i pritet shiriti kësaj shkolle.

“Do të jenë nëntë klasë të shkollës fillore dhe një klasë e çerdhes për fëmijë me ç’rast do të ketë edhe bibliotekë, sallë të arsimtarëve, kabinete e kështu me radhë në mënyrë që kushtet të jenë moderne për mësimdhënie sa më të mirë dhe po ashtu për mësimnxënie me standardet më të larta”- u shpreh Kurti.

Në vënien e gurit të themelit morën pjesë edhe kryetari i Komunës së Mitrovicës së Veriut, Erden Atiq, ministrja në detyrë e Arsimit, Arbërie Nagavci, kandidati për kryetar në Mitrovicë të Jugut, Faton Peci dhe ministri në detyrë i Punëve të Brendshme, Xhelal Sveçla.

Ndonëse kryetari i Komunës së Mitrovicës së Veriut, Erden Atiq, në debatin “Jeta në Komunë” premtoi se në vitin 2025 do të ndërtohet një shkollë në Mitrovicë të Veriut kjo nuk ndodhi.

Tek në gusht është kërkuar leja ndërtimore për ndërtimin e objektit të shkollës së mesme të ulët në lagjen Kodra e Minatorëve.

Më 07.08.2025 ekzekutivi i kishte propozuar Kuvendit të Komunës që të sjellë një vendim për ndërrim të destinimit të parcelës së lartcekur nga tokë bujqësore në tokë ndërtimore.

Ndërkaq, më 28.08.2025, Kuvendi Komunal i Mitrovicës së Veriut miratoi këtë vendim.

https://kallxo.com/lajm/nxenesit-ne-lagjen-kodra-e-minatoreve-serish-do-te-fillojne-mesimin-ne-kontejner-tek-ne-gusht-komuna-beri-kerkese-per-parcele/