MPB ndalon përdorimin e fishekzjarreve dhe ndezjen e zjarreve në ambient të hapur 

Ministri në detyrë i Punëve të Brendshme, Xhelal Sveçla ka bërë të ditur se është marrë vendim që të ndalohet rreptësisht ndezja e zjarreve në të gjitha ambientet e hapura duke përfshirë djegien e mbeturinave, pyjeve, fushave, livadheve, ndezjet për rekreacion, piknik si dhe ndezjet e fishekzjarreve.

Në një njoftim të tij, Sveçla shkruan se ky vendim është marrur duke pasur parasysh rrezikun e shtuar nga temperaturat e larta dhe thatësia, si dhe për të parandaluar dëmtimet në mjedis, pasuritë private e publike dhe sigurinë e qytetarëve. 

“Ndezja e zjarreve është vepër penale andaj shkelësit e këtij vendimi do të përballen menjëherë e pa dilemë me masat ndëshkuese që parasheh legjislacioni ynë”- ka shkruar Sveçla, të shtunën, më 05.07.2025. 

Përmes rrjeteve sociale, ministri në detyrë u ka bërë thirrje të gjithë qytetarëve ë të tregojnë kujdes maksimal dhe të respektojnë këtë vendim, duke shmangur çdo veprim që mund të shkaktojë zjarr ose përhapje të tij.

Sveçla shkruan se në rast të vërejtjes së zjarrit apo rrezikut për zjarr, qytetarët të lajmërojnë menjëherë organet kompetente në numrin emergjent 193 ose Policinë e Kosovës në 192.

Një zjarr i madh ka shpërthyer në Golesh të premten, më 04.07.2025. Lajmin e ka konfirmuar për KALLXO.com, Besim Fazliu, udhëheqës i skuadrës së zjarrfikësve të Prishtinës.

Ai ka bërë të ditur se zjarrfikësit janë duke intervenuar në këtë rast. Sipas tij, zjarri kishte nisur para orës 19:00, kur edhe i kishin gjetur kolegët zjarrfikës të Drenasit duke u munduar ta shuajnë atë.

Ndërsa, Afrim Gjeli, komandant i zjarrfikësve në Drenas ka kërkuar ndihmë edhe prej Forcave të Sigurisë së Kosovës (FSK) për ta shuar zjarrin në majën e Goleshit që ka shpërthyer të premten, më 04.07.2025.

KALLXO.com raportoi për zjarrin në majë të Goleshit, në të cilin, mbëmë (04.07.2025) intervenuan edhe zjarrfikësit e Prishtinës.

https://kallxo.com/lajm/zjarr-i-madh-ne-golesh/

Ndërsa, kryetari i Komunës së Drenasit, Ramiz Lladrovci, sot më 05.07.2025, ka njoftuar se zjarri në Golesh (Sankoc) aktualisht, po vazhdon me një intensitet më të ulët.

Derisa, sipas Lladrovcit, në Gjergjicë, zjarri vazhdon të përbëj rrezik dhe se ka kaluar pjesën e Balincëns së Malishevës dhe se zjarrikfësit atje, janë duke u përballur me flakët

https://kallxo.com/lajm/lladrovci-zjarri-ne-golesh-po-vazhdon-me-intensitet-te-ulet-ne-gjergjice-vazhdon-te-kete-rrezik/