Mbahet konferenca përmbyllëse në kuadër të Nismës për të Drejtën e Pronës
Të mërkurën më 09.07.2025, është mbajtur konferenca përmbyllëse në kuadër të Nismës për të Drejtën e Pronës, që zbatohet nga Qendra e Trajnimeve dhe Burimeve për Avokim (ATRC) bashkë me Rrjetin Ballkanik për Gazetari Hulumtuese – BIRN Kosova dhe financohet nga Banka Botërore.
Në këtë konferencë morën pjesë Agjencia Kadastrale e Kosovës, zyrtarë kadastralë nga rajoni i Prishtinës, Prizrenit, Ranillugut dhe Zubin Potokut, përfaqësues nga Oda e Noterëve, Oda e Avokatëve, Oda e Përmbaruesve Privat, Oda e Ndërmjetësuesve dhe gjyqtarë nga Gjykata Themelore në Prishtinë.
Të pranishmit patën mundësinë që nën moderimin e Labinot Leposhticës, koordinator i Zyrës Ligjore në BIRN, të diskutojnë rreth rekomandimeve që kanë dalë nga trajnimet dhe punëtoritë e zhvilluara nga muaji shkurt rreth çështjeve pronësore. Po ashtu, pjesëmarrësit, të gjithë akterë kyç në këtë fushë, patën rastin që të shpalosin problematikat dhe praktikat e tyre duke mundësuar rritjen e bashkëpunimit dhe kapërcimin e barrierave në të ardhmen.
Nga ky diskutim i hapur mes të gjitha palëve, dolën rekomandime të reja qoftë ndryshime ligjore dhe amandamentale, për t’i kontribouar lehtësimit dhe zgjidhjeve të çështjeve pronësore.
Mbi 30 pjesëmarrës ishin pjesë e kësaj konference, pas përfundimit të ciklit të një serie trajnimeve dhe punëtorive duke filluar nga ngritja e kapaciteteve të zyrave kadastrale komunale.
Në mesin e zyrtarëve kadastralë komunalë në këtë ngjarje ishin edhe nga komuniteti serb.
BIRN Kosova nga muaji shkurt deri në qershor 2025 ka mbajtur trajnime dhe punëtori me zyrtarët kadastralë, noterë, avokatë, përmbarues, ndërmjetësues dhe gjyqtarë lidhur me çështjet pronësore.
Projekti Nisma për të Drejtën e Pronës (NDP), zbatohet nga Qendra e Trajnimeve dhe Burimeve për Avokim (ATRC), bashkë-zbatohet nga BIRN Kosova dhe financohet nga Banka Botërore/ Fondi për Paqe dhe Shtet-Ndërtim. NDP, synon të adresojë nevojën kritike për përmirësimin e qasjes në informacionin për regjistrimin e tokës dhe pronës, si dhe ofrimin e shërbimeve të këshillimit në lidhje me të drejtat pronësore për gratë, të rinjtë dhe personat e cenueshëm në Kosovë.
Aktivitetet e projektit do të ndihmojnë në përmirësimin e kushteve socio-ekonomike për zhvillim të qëndrueshëm dhe paqësor, duke ndihmuar komunitetet me dokumentacionin e nevojshëm dhe të mbështetur ligjërisht për forcimin e sigurisë së të drejtave mbi tokën/pronën, duke ofruar një mundësi për pjesëmarrjen e tyre në ekonominë më të gjerë dhe duke vendosur bazat për një shoqëri më të barabartë.
